Ukol qilishni ko‘p odam xush ko‘rmaydi. Vaziyat taqozosi bilan bu ishni bajarsa-yu, inyeksiya o‘rnida og‘riq paydo bo‘lsa, bu yanada yoqimsiz holat. Inyeksiya joyining og‘rig‘iga nima sabab bo‘lishi mumkin? Bu borada nimalarni bilish muhim?
Mushak ichiga qilingan inyeksiyadan keyin og‘riq quyidagi sabablarga ko‘ra paydo bo‘ladi:
- Noto‘g‘ri qilingan inyeksiya texnikasi tufayli yallig‘lanish;
- Dori-darmonlarga allergik reaksiya;
- Preparat uzoq vaqt davomida so‘riladi, bu esa og‘riqli shish paydo bo‘lishiga olib keladi.
Agar og‘riq dori allergiyasidan kelib chiqsa, inyeksiya joyi nafaqat og‘riydi, balki qichishadi ham. Og‘riq pulsatsiyalanuvchi xarakter bilan paydo bo‘lsa, bu yallig‘lanishdir. Dori-darmon qoldirgan shishni qo‘l bilan yengil bosish orqali sezish mumkin.
Bordi-yu inyeksiya joyi og‘risa, shu bilan birga harorat ko‘tarilsa yoki shish, yiringlash, kuchli qizarish kuzatilsa, darhol shifokor ko‘rigidan o‘tish zarur. Bu yiringli yallig‘lanish jarayoni bo‘lishi mumkin. U holda o‘z-o‘zini davolashga harakat qilish xavflidir.
Inyeksiyadan keyin paydo bo‘ladigan og‘riqning oldini olish mumkinmi?
Sifatli shpris va preparatni sekin-asta mushak ichiga yuborish inyeksiyadan keyin og‘riqli shish paydo bo‘lishining oldini olishga yordam beradi.
Preparat mushak ichiga chuqur kirib borishi uchun yetarlicha uzunlikdagi ignali shprisdan foydalanish kerak, yaʼni hajmi kamida 5 millilitr.
Asosi yog‘ bo‘lgan dorilarni inyeksiya qilishda ampulani qo‘llaringiz kaftlarida yoki iliq suvda isitish lozim. Uni sovuq shaklda kiritish tufayli og‘riqli shish, hatto, yallig‘lanish paydo bo‘lishi hech gap emas.
Yaxshisi, inyeksiya qilishni tajribali mutaxassisga topshirgan maʼqul. Agar asab tolasiga tegib yuborsangiz, bemor uzoq vaqt og‘riqdan aziyat chekishiga to‘g‘ri keladi.
Preparat yaxshiroq so‘rilishi uchun uni bo‘shashgan mushak ichiga yuborish kerak. Buning uchun eng yaxshi holat yuztuban yotishdir.
Agar mushak ichiga inyeksiya kursini o‘tkazish kerak bo‘lsa, joyni har kuni o‘zgartirish kerak, yaʼni chap va o‘ng yonboshda navbat bilan inyeksiya qilgan yaxshi. Ko‘proq yursangiz, dori tezroq so‘riladi.
Inyeksiya qilingan joy og‘riyapti. Xalqona usullar yordam beradimi?
Agar ho‘ppoz va isitma bo‘lmasa, lekin inyeksiya joyida og‘riq sezilsa, og‘riq qoldiruvchi vositalarni qabul qilish, tasdiqlangan usullardan birini qo‘llash mumkin:
- Karam bargini yuving, yengil urib, og‘riqli joyga bostiring. Bir kun yoki kamida bir kecha qoldiring;
- Asalga allergiya bo‘lmasa, un bilan asaldan xamir tayyorlab, uni kompress sifatida qo‘llasa bo‘ladi. qorishmani og‘riq ustiga qo‘yib folga bilan yoping, ustidan bog‘lab, bir kecha kuting. Ertalab yuvib tashlang;
- Qirg‘ichdan o‘tkazilgan turp va asaldan kompress qiling, og‘riq joyiga uch soat ushlang;
- Kefir yoki shakarsiz yogurtga paxta yoki tamponni botirib oling. Og‘riq ustiga surib, ustidan plyonka yoping va bir soatga qoldiring.
Inyeksiya joyining nima uchun og‘riyotganini anglagan holda xalqona usullar va tibbiy vositalar yordamida ahvolingizni yengillashtirishingiz mumkin. Biroq, baʼzi muolajalar qatʼiyan tavsiya etilmaydi. Masalan, og‘riqli joyni, shu jumladan hammom yoki saunada qizdirish. Bu yallig‘lanish jarayonining kuchayishiga olib keladi. Inyeksiya qilingan joyni massaj qila olmaysiz. Agar uning ostida ho‘ppoz bo‘lsa va u yorilib ketsa, qonni zaharlaydi.
Spirtli kompresslardan faqat og‘riqlar preparatning sekin so‘rilishidan kelib chiqqanligiga ishonch hosil qilgan taqdirdagina foydalanish tavsiya etiladi. Yallig‘lanish jarayoni bo‘lsa, u bu bilan faqat kuchayadi.
Ehtiyot choralarini ko‘rish va og‘riqni to‘g‘ri bartaraf etish orqali siz 2-3 kundan keyin uning yo‘qolishiga erishishasiz. Kichkina shish hali ketmasa, davolanish kursini davom ettirish mumkin, shish vaqt o‘tib yo‘qolib ketadi.
Mavzuga doir:
Izoh (0)