Toshkent aeroportida yo‘lovchilarni kutib olish uchun yangi zonalar quriladi

Uzbekistan Airports yo‘lovchilarni kutib oluvchilar uchun Toshkent xalqaro aeroportining uchib kelish zali yonidagi P2 va P3 avtoturargohlarida ikkita yangi hudud qurishga qaror qildi. Bu haqda aviakompaniya axborot xizmati xabar berdi. 

Xabarga ko‘ra, yo‘lovchilar oqimining jadal sur’atlarda o‘sib borayotgani sababli yaqinlari va do‘stlari bilan uchrashish uchun kelganlarga uchib kelish terminalida ajratilgan hudud yetarli bo‘lmay qolgan. Uzbekistan Airports aksiyadorlik jamiyati boshqaruvi raisi Ra’no Jo‘rayevaning ta’kidlashicha, 2018-yilda qurilgan uchib kelish zali xalqaro standartlarga javob bermaydi, u yerda kutib oluvchilar uchun joy ajratilmagan. 

“14-yanvardan boshlab qattiq sovuq tufayli respublika aeroportlari aerovokzal binosida odamlarni kutib olish uchun ruxsat oldi. Ilgari takidlanganidek, 2018-yilda qurilgan uchib kelish zali xalqaro standartlarga javob bermaydi, u yerda kutib oluvchilar uchun joy ajratilmagan. Bir necha kun ichida biz bojxona zonasini kutib olish zonasidan ajratish choralarini ko‘rdik. 400 kv.m maydon har kuni aeroportga yaqinlarini kutib olishga kelganlar uchun juda torlik qildi.  Odamlarning ko‘pligi kutib oluvchilar uchun ham, jonli yo‘lakdan o‘tishga majbur bo‘lgan yo‘lovchilar uchun ham noqulayliklar tug‘dirdi. Yo‘lovchilar va xavfsizlikni ta’minlovchi xizmatlardan juda ko‘p shikoyatlar kelib tushdi. Bu vaqt davomida biz kutib oluvchilar uchun yangi hudud loyihasi ustida ishladik. Ammo birgina bino vaziyatni sezilarli darajada o‘zgartirmasligini anglab yetdik”, — dedi Uzbekistan Airports aksiyadorlik jamiyati boshqaruvi raisi Ra’no Jo‘rayeva.

Ma’lum qilinishicha, mart oyining oxiriga qadar umumiy maydoni qariyb 1400 kv.m bo‘lgan ikkita shunday hudud quriladi — biri mavjud soyabonlar o‘rniga, ikkinchisi — ketish va kelish zallari oralig‘idagi P2 avtoturargohida. Yaqin kunlarda aeroport oldi maydonida qurilish-montaj ishlarini boshlash rejalashtirilgan.