G7 davlatlari Xitoy, Shimoliy Koreya va Eronga qarshi sanksiyalar tayyorlamoqda — Bloomberg

Katta yettilik davlatlari (G7 — Buyuk Britaniya, Germaniya, Italiya, Kanada, Fransiya, Yaponiya va AQSH) Rossiyaga harbiy mahsulotlar yetkazib berayotgani aytilayotgan Xitoy, Shimoliy Koreya va Eron kompaniyalariga nisbatan sanksiyalar qoʻllash imkoniyatini muhokama qilmoqda. Bu haqda Bloomberg manbalariga tayanib xabar berdi.

Nashr ma’lumotlariga ko‘ra, G7 davlatlari 24-fevral – Rossiyaning Ukrainaga keng ko‘lamli bosqini boshlanganiga bir yil to‘lishiga qadar ushbu sanksiyalar paketini kelishib olishga urinmoqda.

Shu bilan birga, Bloomberg manbalari bu cheklovlar hali shakllanish bosqichida ekani va G7 davlatlari bundan boshqa harakatlar qo‘llashi mumkinligini ham ta’kidladi.

Nashrning qo‘shimcha qilishicha, qora ro‘yxatga kiritilishi mumkin bo‘lgan kompaniyalar ham tasdiqlash bosqichida.

AQSH Milliy xavfsizlik kengashi nashrga ushbu masala bo‘yicha birorta ma’lumot berishdan bosh tortdi.

AQSH va boshqa g‘arb mamlakatlari ma’lumotlariga ko‘ra, Rossiya urushda Eronning jangovar dronlaridan foydalanmoqda. Shuningdek, “Vagner” xususiy harbiy kompaniyasi Shimoliy Koreya qurollaridan foydalanayotgani haqida ham xabarlar bor.