Shveysariya Ukrainaga qurol yetkazib berish masalasida betaraflikdan voz kechishi mumkin

Shveysariya Ukrainaga qurol yetkazib berish masalasida betaraflikdan voz kechishga yaqin turibdi. Bu haqda Reuters yozmoqda.

Agentlikning ta’kidlashicha, mamlakat Germaniya va Daniyaning so‘rovini rad etganidan keyin unga bosim kuchaygan. Yevropa Ittifoqi mamlakatlari Berndan qurol-yarog‘ reeksport qilishga qo‘yilgan taqiqning yumshatilishini istamoqda. Shveysariya hozirgi paytda harbiylarga qurol jo‘nata olmaydi. Bundan tashqari, mamlakat Ukraina va Rossiyaga nisbatan alohida-alohida qurol embargo kiritgan.

Shveysariya parlamentariylarining bu boradagi fikrlari ikkiga bo‘lingan. Mamlakatning o‘ng markazchi Erkin demokratik partiyasi yetakchisi Tyerri Burkart Kiyevga qurol yetkazib berishdan bosh tortish Moskvani qo‘llab-quvvatlashni anglatishini aytdi. “Bizdagi veto huquqi boshqalarning Ukrainaga yordam berishiga to‘sqinlik qilmasligi kerak”, — dedi u.

Qayd etilishicha, mamlakatdagi saylovchilarning yarmidan ko‘pi (55 foizi) ham Ukrainaga qurol-yarog‘ reeksport qilinishiga ruxsat berish tarafdori. Sotomo tomonidan o‘tkazilgan so‘rov natijalari shundan dalolat bermoqda. Shu bilan birga, Shveysariya Xalq partiyasi deputati Devid Suberbyuler qurolli to‘qnashuvda ishtirok etayotgan davlatga qurol jo‘natishiga ruxsat berish Shveysariyadagi “tinchlik va farovonlik poydevorini yo‘q qilishini” aytdi.