Neft bozorining yangi xaritasi: Hindiston qanday qilib Rossiya xom neftini G‘arbga yetkazib bermoqda?

Hindiston jahon neft bozorida tobora muhim rol o‘ynamoqda, arzonroq rus neftini sotib olib, uni Yevropa va AQSH uchun yonilg‘i qilib qayta ishlamoqda. Bu haqda Bloomberg xabar berdi. 

Yevropa sanksiyalarni kuchaytirar ekan, Hindiston Rossiyaning Ukrainadagi bir yillik urushi tufayli qayta chizilgan global neft xaritasining markaziga aylandi.

“AQSH g‘aznachiligining ikkita asosiy maqsadi bor: bozorni yaxshi ta’minlash va Rossiyani neft daromadidan mahrum qilish. Ular Hindiston va Xitoy neftni qayta ishlash korxonalari chegirmali Rossiya xomashyosini sotib olish va mahsulotlarni bozor narxlarida eksport qilish orqali katta foyda olishlari mumkinligini biladi. Ular (AQSH g‘aznachiligi tahr.) bunga rozi”, — deydi Strategik va xalqaro tadqiqotlar markazi xodimi Ben Keyxill. 

Kpler kompaniyasi ma’lumotlariga ko‘ra, Hindiston o‘tgan oy Nyu-Yorkka kuniga taxminan 89 ming barrel benzin va dizel yetkazib berdi. Bu qariyb to‘rt yil ichidagi eng yuqori ko‘rstakich.  

Yevropa Ittifoqining Rossiya neft eksportiga qarshi yangi sanksiyalari yakshanba kuni kuchga kirganidan keyin Osiyo davlatining ahamiyati oshishi kutilmoqda. 

Taqiq katta hajmdagi dizel yonilg‘isini bozordan olib tashlaydi. Buning ortidan Yevropa ta’minot bo‘shlig‘ini to‘ldirish uchun Osiyoga yuzlanadi.

Bu o‘zining xomashyoga bo‘lgan ehtiyojining 85 foizini importga tayanadigan Hindiston uchun arzon Rossiya neftini yanada jozibador qiladi. 

Mamlakatning neftni qayta ishlash korxonalari, jumladan, ichki talabni qondirish uchun mas’ul bo‘lgan davlat protsessorlari yuqori xalqaro narxlardan foyda olish uchun o‘tgan yili eksportni ko‘paytira boshlagandi. 

Yevropa Ittifoqi ko‘rsatmalariga ko‘ra, Hindiston qoidalar doirasida ishlaydi. Rossiya xomashyosi Hindiston kabi blokdan tashqarida joylashgan mamlakatda yonilg‘iga aylantirilganda, tozalangan mahsulotlar Yevropa Ittifoqiga yetkazib berilishi mumkin, chunki ular Rossiyada ishlab chiqarilgan deb hisoblanmaydi.

“G7 davlatlari Moskvaning daromadlarini imkon qadar qisqartirishga intiladi, biroq ular Rossiya nefti va qayta ishlangan mahsulotlari global ta’minot inqiroziga yo‘l qo‘ymaslik uchun bozorni ta’minlashidan ham manfaatdor” — dedi Vortexa kompaniyasining Osiyo bo‘yicha yetakchi tahlilchisi Serena Xuang.