Checheniston rahbari Ramzan Qodirov yaqin qarindoshlari davlat lavozimiga tayinlangani sababli uni qonunbuzarlikda ayblashlarini “kulgili” deb atadi.
Qodirov ForPost nashrining “Qodirovlar sulolasi” haqidagi materialiga shu tarzda javob berdi, unda Checheniston rahbarining 26 yoshli jiyani Hamzat Qodirovning mulk va yer munosabatlari vaziri, respublika bosh vazirining o‘rinbosari lavozimlariga tayinlangani haqida so‘z boradi. Maqolada nashr sotsiolog Anna Ochkina va siyosatshunos Yuriy Samonkinning fikriga, shuningdek, “Davlat fuqarolik xizmati to‘g‘risida”gi federal qonunning 16-moddasiga ishora qiladi, unga ko‘ra, agar biri boshqasiga bo‘ysunadigan bo‘lsa, yaqin qarindoshni davlat xizmatiga qabul qilish taqiqlanadi.
“Ochkin va Samonkin kabilarning malakasi bir tiyinga arzimaydi. Ularning vahimalarini tinglang, mintaqadagi yuz minglab xodimlar orasida mening bir nechta yaqin qarindoshlarim borligi sababli butun respublika parchalanarmish. Kulgimni qistamang”, — deb yozdi Checheniston rahbari Telegram’dagi kanalida. “Qaysi muassasa va qaysi lavozimda bo‘lmasin, qarindoshlarimga ishga qo‘yilgan talab o‘n barobar ko‘p, chunki ular menga rahmat aytish uchun emas, menga qaramay ishlayotganini isbotlashi kerak. Kimga ishonsam, shuni tayinlayman”.
BBC rus xizmatining 2018-yilgi hisob-kitoblariga ko‘ra, Chechenistondagi 158 nafar yuqori martabali amaldorning 30 foizi Ramzan Qodirovning qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir. 2021-yilda Checheniston rahbari Ramzan Qodirovning qizi Oishat respublika madaniyat vaziri bo‘ldi. Bu lavozimga tayinlanganida u 22 yoshda edi.
Izoh (0)