Belgiya Germaniya bilan chegaradagi 40 yillik yadro reaktorini yopdi

Belgiya mamlakatning atom energiyasiga qaramligini kamaytirish uchun to‘rt oy ichida ikkinchi yadro reaktorini yopdi, deb xabar bermoqda Deutsche Welle.

40 yillik “Tixange-2” reaktori uzoq vaqtdan beri qo‘shni Germaniyada bahs-munozaralarga sabab bo‘lib kelayotgandi. Nemis rasmiylari bir necha yillar davomida xavfsizlik muammolarini ko‘tarib, zavodning bosim ostidagi korpuslarida yoriqlar topilganidan keyin uni yopishni talab qila boshladi. Belgiya bu boradagi shartlarning oshib borishiga qaramay, mamlakatga atom energiyasi yetkazib berishni to‘xtatish rejalarini ortga surib keldi.

Reaktor Germaniya bilan chegaradan 50 kilometr uzoqlikda joylashgan. Germaniya atrof-muhit vaziri Steffi Lemke mahalliy OAVga shunday dedi:

“Stansiyaning yopilishi ikki mamlakatda xavfsizlikning sezilarli darajada oshishini kafolatlaydi. Belgiyaning atom energetikasini bosqichma-bosqich toʻxtatish boʻyicha uzoq muddatli saʼy-harakatlari doirasida ‘Tixange-2’ reaktori yarim tungacha ekspluatatsiyadan to‘liq chiqariladi”.

2003-yildan beri Belgiya qonunlari yadroviy energiyadan bosqichma-bosqich voz kechishni talab qilmoqda. Biroq Rossiyaning Ukrainaga qarshi urushi Yevropa energetika bozorlarini parchalab tashlagani va narxlarning keskin ko‘tarilishiga olib kelgani uchun hukumat atom energiyasidan voz kechishni o‘n yilga kechiktirdi. Hukmron koalitsiya tarkibiga kiruvchi Belgiya Yashillar partiyasi esa yadro energetikasini mamlakat energiya ta’minotidan chiqarib tashlashning har qanday tarzda kechikishiga qarshi.