2023-yilda Andijon, Quvasoy, Qoʻqonda, “Yangi Andijon” va “Eko Fargʻona” massivlarida kogeneratsiya loyihalari amalga oshiriladi 

Ayni vaqtda prezident Shavkat Mirziyoyev Yangi Andijon tumanida viloyat faollari va masʼullar ishtirokida videoselektor yigʻilishini oʻtkazmoqda. Bu haqda “Daryo” muxbiri xabar berdi. 

Davlat rahbari masʼullarga zamonaviy koʻmir kogeneratsiyasini (yaʼni, bir paytda issiqlik va elektr energiyasini ishlab chiqarishni) joriy qilish boʻyicha topshiriq berdi.

“Misol uchun, joriy yilda Andijon, Quvasoy, Qoʻqonda, “Yangi Andijon” va “Eko Fargʻona” massivlarida kogeneratsiya loyihalari amalga oshiriladi. Lekin, bu juda kam. Bor imkoniyatlardan foydalanayotganimiz yoʻq”, — dedi prezident.

Shavkat Mirziyoyev barcha ijtimoiy obyektlardagi 3 mingta eskirgan qozonlarni zamonaviy uskunaga almashtirish zarurligini aytdi. Bunda, Iqtisodiyot va moliya vazirligi 2023-yilda davlat-xususiy sherikchilik asosida 250 milliard soʻm ajratadi. 

“Vodiyda yiliga 120 million kub metr gaz sarflayotgan 170 ta issiqxona, 64 ta gʻisht va ohak korxonalarini koʻmirga oʻtkazishni tezlashtirish kerak. Yil yakuniga qadar 500 ta koʻp qavatli uylarning energiya tejamkorligini oshirish kerak.  Buning hisobiga vodiyda 400 million kub metr tabiiy gazni iqtisod qilsa boʻladi. Hozirda binolarni isitishga 2-3 baravar koʻp energiya sarflanmoqda”, — deydi prezident.

Shavkat Mirziyoyev bu masalalar boʻyicha xar bir viloyat qoʻshimcha elektr-energiyasi ishlab chiqarish kerakligini aytdi. Xususan:

• Andijon viloyati 500 million kilovatt soat (kutilayotgan tanqislik 405 million kilovatt);

Bu quyosh panellari va kichik FESlar – 85 mln kVt.s, kichik GESlar – 60 mln kVt.s, koʻmir kogeneratsiyasi – 130 mln kVt.s va boshqa tadbirlar hisobiga – 225 mln kVt.s qoplanadi (125 mln kub m gaz iqtisod qilinadi).

Shuningdek, qozonxona va ishlab chiqarishlarni koʻmirga oʻtkazish, hamda qoʻshimcha tadbirlar hisobiga 152 mln kub metr gaz tejaladi (jami gaz iqtisodi – 277 mln kub m.). 

• Fargʻon viloyati 650 million kilovatt soat (kutilayotgan tanqislik 535 million kilovatt);

Bu quyosh panellari va kichik FESlar – 132 mln kVt.s, Fargʻona issiqlik elektr-stansiyasi – 250 mln kVt.s, kichik GESlar – 35 mln kVt.s, koʻmir kogeneratsiyasi – 40 mln kVt.s va boshqa tadbirlar hisobiga – 193 mln kVt.s qoplanadi (163 mln kub m gaz iqtisod qilinadi).

Shuningdek, qozonxona va ishlab chiqarishlarni koʻmirga oʻtkazish, hamda qoʻshimcha tadbirlar hisobiga 347 mln kub metr gaz tejaladi (jami gaz iqtisodi – 510 mln kub m.). 

• Namangan viloyati 600 million kilovatt soat (kutilayotgan tanqislik 490 million kilovatt).

Bu 100 MVt FES hisobiga – 150 mln kVt.s, quyosh panellari va kichik FESlar – 96 mln kVt.s, kichik GESlar – 75 mln kVt.s, koʻmir kogeneratsiyasi – 80 mln kVt.s va boshqa tadbirlar hisobiga – 199 mln kVt.s qoplanadi (150 mln kub m gaz iqtisod qilinadi).

Shuningdek, qozonxona va ishlab chiqarishlarni koʻmirga oʻtkazish, hamda qoʻshimcha tadbirlar hisobiga 268 mln kub metr gaz tejaladi (jami gaz iqtisodi – 418 mln kub m.).

“Bu jami 1 750 kilovatt soat elektr energiya – 388 million kub metr gazni iqtisod qiladi, degani. Bugungi kunda vodiyda gaz defitsiti 1,2 milliard kub metrni tashkil qiladi (Andijonda 162 mln, Fargʻonada 650 mln, Namanganda 418 mln kub metr). Ushbu defitsitni qoplash maqsadida, sement, ohak, gʻisht zavodlari va issiqxonalarni toʻliq koʻmirga oʻtkazish hisobiga 586 million kub metr tabiiy gazni iqtisod qilsa boʻladi”, — dedi Shavkat Mirziyoyev.