Turkiya o‘z fuqarolariga AQSH va Yevropaga bormaslikni tavsiya qilmoqda

Turkiya hukumati o‘z fuqarolarini Yevropa va AQSHga safar qilishning ehtimoliy xavfidan ogohlantirdi, deb xabar bermoqda Deutsche Welle. Turkiya Tashqi ishlar vazirligi Yevropadagi fuqarolarini namoyishlar oʻtayotgan hududlardan nari yurishga chaqirdi. Mamlakat so‘nggi paytlarda musulmonlar va turklarga qarshi avj olgan norozilik qit’ada “diniy murosasizlik va nafratning xavfli darajasini” ko‘rsatayotganini ta’kidladi.

Bundan tashqari, Turkiya AQSHda “xorijiyliklarga nisbatan og‘zaki va jismoniy hujumlar hamda irqchilik harakatlari kuzatilayotgani” sabab, Qo‘shma Shtatlarga sayohat qilmaslik haqida alohida ogohlantirish berdi.

Turkiyaning ogohlantirishlari Daniya, Finlyandiya, Norvegiya va Shvetsiyaning shunday ogohlantirishlaridan keyin paydo bo‘ldi. Yevropaning ushbu to‘rt davlati Turkiyaga sayohat qilish bo‘yicha maslahatlarini yangilagan va o‘z fuqarolarini bu mamlakatdagi norozilik namoyishlaridan qochishga chaqirgandi.

Ma’lumot uchun 21-yanvar kuni daniyalik o‘ta o‘ngchi siyosatchi Rasmus Paludan (u Shvetsiya fuqaroligiga ham ega) Turkiyaning Stokgolmdagi elchixonasi oldida Qur’onni yoqib yubordi. Oradan bir hafta o‘tib, Kopengagendagi Turkiya elchixonasi oldida ham Qur’on yoqildi. Bu harakatlar ortidan turklar Shvetsiyaning Anqaradagi elchixonasi va Istanbuldagi bosh konsullik binosi oldida norozilik namoyishlari o‘tkazdi.