Banklar, IT va sanoat: O‘zbekistonning eng yuqori oylik to‘langan sohalari e’lon qilindi
2022-yilda O‘zbekistondagi iqtisodiy faoliyat turlari bo‘yicha o‘rtacha ish haqi miqdorlari ma’lum qilindi. Bu haqda Davlat soliq qo‘mitasi xabar berdi.
Iqtisodiy faoliyat turlari bo‘yicha o‘rtacha oylik ish haqining eng baland ko‘rsatkichi — bank, sug‘urta, lizing va kredit vositachilik sohalariga to‘g‘ri keladi (10,8 mln so‘m).
Ushbu faoliyat turi bo‘yicha o‘rtacha oylik ish haqining eng yuqori ko‘rsatkichi moliyaviy xizmatlar ko‘rsatish va sug‘urtalash bo‘yicha yordamchi faoliyatda (12,2 mln so‘m) qayd etildi.
Eng past ko‘rsatkichi esa majburiy ijtimoiy sug‘urtalashdan tashqari, qayta sug‘urtalash va nafaqa jamg‘armalari faoliyatida (10,3 mln so‘m) kuzatildi.
Axborot va aloqa sohasida o‘rtacha oylik ish haqi 7,5 mln so‘mga teng bo‘lgan bo‘lsa, tashish va saqlash sohasida bu qiymat 5 mln so‘mni tashkil etadi.
Sohaning asosiy tarmoqlari bo‘yicha o‘rtacha oylik ish haqining eng yuqori ko‘rsatkichi kompyuter dasturlashtirish, maslahat berish va boshqa yordamchi xizmatlarda (13,9 mln so‘m), eng past ko‘rsatkich esa noshirlik faoliyatida (6,5 mln so‘m) kuzatildi.
Sanoat sohasida o‘rtacha hisoblangan nominal ish haqi o‘tgan yilga nisbatan 642 mingga o‘sib, 4,9 mlnni tashkil qilmoqda.
Sanoatning asosiy tarmoqlari bo‘yicha o‘rtacha oylik ish haqining eng yuqori ko‘rsatkichi tog‘-kon sanoati va ochiq konlarni ishlash tarmog‘i (7,1 mln so‘m), elektr, gaz, bug‘ bilan ta’minlash va havoni konditsiyalash (5,7 mln so‘m) hamda ishlab chiqarish sanoatida (4,7 mln so‘m) kuzatildi.
Qurilish sohasida bu mablag‘ 4,6 mln so‘mga teng hisoblangan bo‘lsa, savdoda o‘rtacha hisoblangan ish haqi — 3,9 mln so‘m.
Sohalar bo‘yicha ta’lim va sog‘liqni saqlash tizimida eng kam o‘rtacha oylik ish haqi to‘lanadi.
2022-yilda ta’lim sohasi uchun o‘rtacha oylik ish haqi — 2,69 mln so‘m hisoblangan.
Ta’lim sohasining asosiy tarmoqlari bo‘yicha o‘rtacha oylik ish haqining eng yuqori ko‘rsatkichi oliy ta’limda (6,1mln so‘m), eng past ko‘rsatkich esa maktabgacha ta’limda (1,5 mln so‘m) kuzatildi.
Sog‘liqni saqlash va ijtimoiy xizmatlar ko‘rsatishda o‘rtacha oylik ish haqi 2,61 mln so‘mga teng deb belgilangan.
