Qo‘qon oziq-ovqat texnologiyasi xalqaro instituti tashkil etildi
Prezidentning 26-yanvardagi tegishli qarori bilan O‘zbekistonda Oziq-ovqat texnologiyasi va muhandisligi xalqaro instituti tashkil etildi.
Qaror bilan institut huzurida Qoʻqon oziq-ovqat sanoati va xizmat koʻrsatish texnikumi va Agrobiznes subyektlari salohiyatini oshirish markazi – Capacity Building Center tashkil etildi.
Institutning asosiy vazifalaridan biri oziq-ovqat mahsulotlarini qayta ishlash sohasida kichik va oʻrta biznes uchun raqobatbardosh texnologiyalar, jarayonlar va tarmoqlarni rivojlantiradigan mukammal texnologlar, yetuk kadrlar va biznes rahbarlarini tayyorlash hisoblanadi.
Institutda oʻqitish ingliz, rus va oʻzbek tillarida hamda kunduzgi, sirtqi va masofaviy taʼlim shakllarida amalga oshiriladi.
2024/2025-oʻquv yilidan institutda bakalavriat taʼlim yoʻnalishlari boʻyicha dual taʼlim tizimi joriy qilinadi.
2024-yil 1-yanvardan institutning ilmiy salohiyatini oshirish uchun oziq-ovqat sanoati va uni qayta ishlash boʻyicha ilmiy pedagogik kadrlar (tayanch doktorantura (PhD) va doktorantura (DSc) tayyorlash tizimi yoʻlga qoʻyiladi.
Shuningdek, texnikumni muvaffaqiyatli tamomlagan bitiruvchilar institutga sohaga mos boʻlgan bakalavriat taʼlim yoʻnalishlari boʻyicha kirish imtihonlarisiz yakka tartibdagi suhbat orqali 2-kursdan toʻlov-kontrakt asosida qabul qilinadi.
Ushbu xalqaro institut tashkil etilishi haqida 2022-yilning yozida ma’lum qilingandi. U O‘zbekiston qishloq xo‘jaligini rivojlantishning 2020—2030-yillarga mo‘ljallangan strategiyasida belgilangan vazifalar ijrosini samarali tashkil etish, qishloq xo‘jaligi va oziq-ovqat mahsulotlarini qayta ishlash, sohada xalqaro standartlar asosida oliy ma’lumotli yuqori malakali mutaxassislar tayyorlashni tashkil etish hamda O‘zbekistonning oliy ta’lim sohasidagi xalqaro hamkorligini yanada kengaytirish maqsadida tashkil etildi.
