Aholi qulayligi uchun yangi loyiha: Mobil tibbiyot punktlari
Toshkent shahar hokimi vazifasini bajaruvchi Baxtiyor Rahmonovning qaroriga ko‘ra, poytaxtdagi 40 ta mahallaga o‘rnatilgan konteynerlarda tibbiyot punktlari tashkil etilishi belgilangan.
Ijtimoiy tarmoqlarda bu qaror ko‘plab muhokamalarga sabab bo‘ldi. Ko‘pchilik foydalanuvchilar ushbu tibbiy konteynerlar qishda sovuq, yozda issiq bo‘lishi, bemorlar uchun yana ko‘plab noqulayliklar keltirib chiqarishi mumkinligi bo‘yicha xavotir bildirishdi.
Go‘yoki sifatli, shinam, barcha sharoitlarga ega oilaviy poliklinikalar qurish o‘rniga mutasaddilar bitta konteyner o‘rnatish orqali muammoni osongina hal qilmoqchidek tuyuldi bu qaror.
Ammo hozir jamiyatda “urfga aylangan” masalaning mohiyatini to‘liq anglamay turib, shoshilib munosabat bildirishdan tiyilib, Sog‘liqni saqlash vazirligining izohiga quloq tutsak, aslida bu qaror ko‘plab insonlar uchun qulaylik tug‘dirish maqsadida qabul qilinganini ko‘rish mumkin.
SSVning ta’kidlashicha, avvalo bunday tibbiy punktlarga elektr energiya va suv tarmoqlari tortilib, issiq hamda sovuq kunlarda havo moʻtadilligini ta’minlovchi moslamalar o‘rnatiladi. Qisqacha aytganda, risoladagi poliklinikada qanday sharoit bo‘lishi kerak bo‘lsa, shunday sharoit yaratiladi.
Mobil tibbiyot punktlari nima o‘zi?
Mobil tibbiyot punktlari konteynerlardan tashkil etilib, barcha zarur dori-darmonlar, kerakli tibbiy buyumlar, jumladan, EKG va 18 turdagi tibbiy asbob-uskuna hamda jihozlar bilan ta’minlanadi. Ertalab soat 8:00 dan kechki 20:00 gacha ishlovchi ikki koykali “kichik shifoxona”da umumiy amaliyot shifokori va 2 nafar hamshira aholiga mobil tibbiy xizmat ko‘rsatadi.
Loyihaga qancha mablag‘ ajratiladi?
Ushbu punktlarni jihozlash, ularning uzluksiz faoliyatini ta’minlash Toshkent shahar hokimligi tomonidan amalga oshiriladi. Bunday tibbiyot punktlarini tashkil qilish uchun 900 million so‘m mablag‘ ajratiladi. Yil davomida shahar bo‘ylab jami 170 ta konteyner o‘rnatilishi rejalashtirilmoqda.
Maqsad nima?
Bunday mahalla tibbiyot punktlari dispanser nazoratida turgan keksalar, homilador ayollar va bolalarni tibbiy ko‘rikdan o‘tkazishda oilaviy shifokorga katta yengillik beradi.
Fuqarolarning oddiy ko‘riklar uchun o‘z hududidagi poliklinikaga qatnashiga zarurat qoldirmaydi. Chunki ular poytaxtning aholi gavjum bo‘lgan ko‘p qavatli uylari yoniga o‘rnatiladi.
Bu tibbiy punktlar bemorlarning statsionar davolanishiga emas, balki ularga birlamchi tezkor xizmat ko‘rsatish uchun mo‘ljallangan. Ajratilayotgan mablag‘lar esa kichik “poliklinika”da ham xuddi oilaviy poliklinikalardagi sharoitlarni hozirlash uchun sarflanadi.
