Shveysariya hukumati Qirg‘izistonda tabiiy ofatlarga chidamli infratuzilmani yaratish uchun 9 million dollar ajratadi. Bu haqda Shveysariyaning Qirg‘izistondagi elchixonasi matbuot xizmati xabar berdi.
Xabarga koʻra, mablag‘lar Oʻsh, Botken va Norin viloyatlaridagi loyihalarni moliyalashtirishga yoʻnaltiriladi. Ular tabiiy ofatlarni: qurg‘oqchilik, sel, toshqin va boshqalarni boshqarish, ularga qarshi kurashishda tizimli yondashuvni ishlab chiqishni ta’minlashi kerak. Loyihalar natijasida 250 mingta eng zaif uy xo‘jaliklari ishonchli iqlim prognozlarini oladi va yuzaga kelishi mumkin bo‘lgan ofatlarga oldindan tayyorgarlik ko‘radi.
“Shveysariya hukumati Jahon oziq-ovqat dasturi doirasida eng zaif qishloq jamoatlarining iqlim o‘zgarishi va tabiiy ofatlar xavfiga chidamliligini oshirish uchun 9 million dollardan ortiq mablag‘ ajratmoqda. Ushbu komponent Jahon oziq-ovqat dasturi tomonidan Qirg‘iziston respublikasi Favqulodda vaziyatlar vazirligi bilan hamkorlikda amalga oshirilmoqda”, — deyiladi elchixona xabarida.
Mazkur loyihalarni moliyalashtirish bo‘yicha kelishuv Shveysariyaning Qirg‘iziston respublikasidagi elchisi Olivye Bangerter va BMT Jahon oziq-ovqat dasturi vakili va mamlakat direktori Kojiro Nakay tomonidan imzolangan.
Kelishuv doirasidagi dasturni amalga oshirish kelgusi besh yilga mo‘ljallangan.
Oxirgi yillarda Qirg‘iziston hududida bir qancha tabiiy ofatlar qayd etilib, insonlar qurbon bo‘ldi. Ko‘chkilar tufayli ko‘plab turar joy binolari va aholi punktlari infratuzilmasiga shikast yetdi. Toshqin va sellar har yili yuzlab uylarni yuvib ketib, o‘nlab odamlar halok bo‘lmoqda.
Izoh (0)