“Qirg‘izistonda 100 gektar intensiv bog‘ va issiqxonalar tashkil qilish bo‘yicha kelishuvlarni amalga oshirdik” — O‘zbekiston qishloq xo‘jaligi vaziri

O‘zbekiston prezidenti Shavkat Mirziyoyevning Qirg‘izistonga tashrifi arafasida “Qirg‘iziston – O‘zbekiston” biznes-forumi bo‘lib o‘tdi. Forum doirasida O‘zbekiston Qishloq xo‘jaligi vaziri Aziz Voitov intervyu berdi. 

Voitovning so‘zlariga ko‘ra, vazir qishloq xo‘jaligi yo‘nalishida qirg‘izistonlik hamkasbi bilan hujjat imzolagan. 

“Bu hujjat keng tarmoqli yo‘nalishlarni o‘z ichiga olgan yo‘l xaritasi bo‘lib, bunda, asosan, biz hamkorlikda qiladigan chorvachilik, meva-sabzavotchilik va boshqa shu kabi yo‘nalishlardagi loyihalar kiritildi. Xabaringiz bor, ikki davlat rahbarlarining o‘zaro do‘stona aloqalari doirasida vazirliklarga ham hamkorliklarni keng yo‘lga qo‘yish bo‘yicha topshiriq, yo‘nalish berilyapti. Ikki davlat tadbirkorlari ko‘p loyihalarni birgalikda amalga oshiryapti”, — deydi Qishloq xo‘jaligi vaziri. 

Aziz Voitovning aytishicha, ikki mamlakat xalqida birgalikda ishlash, hamkorlikda loyihalarni amalga oshirishga juda katta xohish bor. 

“Bizning ikki vazirlik ham o‘z yo‘nalishlarimiz bo‘yicha keng qamrovli yo‘nalishlarni kelishib oldik. Aytishim kerakki, juda ochiq, samimiy, ikki tomonlama manfaatli uchrashuvlar bo‘lib, hamma yo‘nalishlarni qamrab oldi. Jumladan, chorvachilik yo‘nalishida biz Qirg‘izistondagi yerlardan unumli foydalangan holda, qirg‘iz do‘stlarimiz bilan hamkorlikda chorvachilik komplekslari, mayda shoxli, yirik shoxli qoramollarni boqish, yetishtirish hamda qayta ishlash bo‘yicha agrokomplekslar tashkil qilishni yo‘lga qo‘ymoqchimiz. O‘zbekistonda davlatimiz rahbari tashabbuslari bilan meva-sabzavot sohasi ancha rivojlangan. 

Endi biz qo‘shnilarimizga bu tajribani ulashib, bu yerda boshlanishiga 100 gektar intensiv bog‘, issiqxonalar tashkil qilish bo‘yicha kelishuvlarni amalga oshirdik. Meva-sabzavot mahsulotlarini qayta ishlash bo‘yicha ham birgalikda uchinchi davlatlarga eksport qilish bo‘yicha ham kelishuvlarni amalga oshirdik. Hozirgi yo‘l xaritasi xususiy tadbirkorlarimizning taxminan 500 mln dollarlik loyihalarini o‘z ichiga olgan kompleks chora-tadbirlardir”, — deydi O‘zbekiston qishloq xo‘jaligi vaziri.