Germaniya shimolida pichoq bilan qurollangan erkak shaharlararo poyezdda yo‘lovchilarga hujum qildi. Kamida ikki kishi halok bo‘ldi, yetti kishi yaralandi, deb xabar bermoqda France 24.
Hodisa Gamburg va Kil shaharlari orasida qatnaydigan poyezdda sodir bo‘ldi, deya ma’lum qildi politsiya vakili, jarohatlanganlardan 3 nafarining ahvoli og‘ir.
Qayd etilishicha, 33 yoshli gumonlanuvchining kelib chiqishi falastinlik, fuqaroligi yo‘q. U Brokshtedt shahridagi temiryo‘l vokzalida qo‘lga olingan va yengil jarohatlar bilan kasalxonaga yotqizilgan.
“Hujumdan so‘ng guvohlar gumondorni politsiya Brokshtedt vokzaliga yetib kelguniga qadar ushlab turishga muvaffaq bo‘lgan”, — deyiladi politsiya bayonotida.
Shuningdek, hujum sabablarini o‘rganishda asosiy e’tibor “barcha yo‘nalishlar”, jumladan, ehtimoliy ekstremizm yoki hujumchining psixologik muammolariga qaratilgani ta’kidlandi.
Federal ichki ishlar vaziri Nensi Feather hujumni “larzaga soladigan yangilik” deb atadi va “bu dahshatli harakat” qurbonlari va ularning oilalariga qayg‘urayotganini bildirdi.
Izoh (0)