“Aristokratlar” jamoani tark etgan va yangi qo‘shilgan a’zolari, konsertdan olinadigan foyda haqida (video)

Ayni kunlarda “Aristokratlar” jamoasi a’zolari navbatdagi yangi konsert dasturiga tayyorgarlik ko‘rmoqda. “Daryo” muxbirlari tayyorgarlik jarayonlarida ishtirok etib, jamoa a’zolari bilan suhbatda bo‘ldi. Jamoa a’zosi Abbosxo‘ja Akromov tarkibda jiddiy o‘zgarish bo‘lgani haqida aytib o‘tdi.

— Yangi konsert dasturi uchun tayyorgarlik ishlarini ancha oldin boshlaganmiz. Ssenariylarni o‘zimiz yozganimiz uchun ham tayyorgarlik ko‘rishimizga ancha vaqt ketadi. Bu yilgi dasturimizni imkon qadar oilaviy ko‘rishga mo‘ljallangan sahna ko‘rinishlarini tanladik. Trendga aylangan mavzular yana nishonimiz ostida bo‘ladi. Xabaringiz bo‘lsa, Maftuna Xolmurodova jamoani tark etdi. U bilan hech qanday kelishmovchilik bo‘lgani yo‘q. Shunchaki u qo‘shiq aytishni istadi. Asosiy tarkibga faqatgina Xonzoda Qambarova qo‘shilgan, qolgan tarkib esa o‘zgargani yo‘q. Ammo massovka sahnalarda ishtirok etish uchun bir nechta yosh aktyorlardan foydalanamiz, — deydi Abbosxo‘ja Akromov.

Abbosxo‘ja Akromov ijtimoiy tarmoq foydalanuvchilariga hazil videolari bilan ham yaxshi tanish. U portnyori Shahlo Alijonovani nima uchun “Aristokratlar” jamoasiga taklif etmaganiga oydinlik kiritdi.

— Guruhga yangi qiz kerak bo‘lgan paytda Shahlo Alijonova allaqachon “Million” jamoasida ishtirok etayotgandi. Boshqa guruhdagi aktrisani tortib olish yaxshi emas. Shu bois Xonzoda Qambarovani taklif etdik. U bir paytlar “Aktyor shou”da ishtirok etib, kastingdan o‘tolmagandi. Ammo u mahoratli aktrisa ekanini hammamiz yaxshi bilardik, — deydi Akbarxo‘ja Akromov.

To‘rtinchi bor yakkaxon konsert dasturini o‘tkazayotgan jamoa dasturlardan foyda oladimi yoki yo‘q. Bu savolga guruh a’zosi quyidagicha javob berdi.

— Konsertga sarflangan mablag‘ o‘zini oqlashi juda qiyin. Konsert berishimizdan asosiy maqsad pul emas. Chunki saroy arendasi va reklamalar juda qimmat turadi. Sarflangan mablag‘ o‘zini oqlagan taqdirda ham biz juda xursand bo‘lamiz. Agar san’atga kasb nuqtayi nazaridan qarab pul topaman desangiz ijod qolib ketadi. Asl ijodni o‘ylaganda esa pul haqida o‘ylamaslik kerak, — deydi Akbarxo‘ja Akromov.

Mavzuga doir:

• Sahna ortidagi janjal, Sitoraning kelinsalomi, “Mario” va “I operatsiyasi”. “Dizayn shou”ning yangi konsert dasturidan reportaj (video)
• Nilufar Usmonova “zapret”da bo‘lganmi? — 15 yilda ilk marta konsert berayotgan xonanda bilan suhbat (foto, video)
• Madaniyat vazirining Sherali Jo‘rayev bilan dueti va Murod Xonto‘rayev oilasiga mukofot. 20 yillik “zapret”dan so‘ng o‘tkazilgan “Zamin yulduzlari” taqdirlash marosimidan reportaj (foto, video)
• Gul o’rniga pitssa olgan hamda sahnada ustidan suv quyilgan Yorqinxo’ja Umarovning konsertidan reportaj (foto, video)