O‘zbekistonda 2022-yilda 91 mingdan ortiq jinoyat ishlari tergov qilindi

Tergov departamenti va uning quyi bo‘linmalari shaxsiy tarkibi ishtirokida 11-yanvar kuni yig‘ilish o‘tkazildi.

Departament xabariga ko‘ra, uchrashuvda 2022-yilda amalga oshirilgan ishlar va yo‘l qo‘yilgan kamchiliklar muhokamasi bo‘lib o‘tgan.

Qayd etilishicha, 2022-yilda 91 mingdan ortiq jinoyat ishlari tergov qilingan bo‘lib, tamomlangan ishlar o‘tgan yilga nisbatan 6 foizga yaxshilangan, jinoyatlar oqibatida yetkazilgan 1 trillion 491 milliard so‘mlik moddiy zararning 80 foizi tergov bo‘linmalari xodimlarining sa’y-harakatlari bilan undirilgan.

Yig‘ilishda jinoyat ishlarini tergov qilish jarayonida protsessual xato va kamchiliklarga yo‘l qo‘yib kelayotgan tergovchilar hamda shahar-tumanlar birma-bir tahlil etilib, faoliyati davomida salbiy natijalarni qayd etgan xodimlarga egallab turgan lavozimidan ozod etishgacha bo‘lgan intizomiy ta’sir choralari qo‘llanilgan.

Mavzuga doir: Shavkat Mirziyoyev: “Tintuv o‘tkazish, telefon so‘zlashuvini eshitish va mulkni xatlashga sanksiyani prokurordan sudga o‘tkazamiz”