Rossiya kemasi Janubiy Afrikaga yashirincha qurol-yarog‘ yetkazib berdi — OAV

Kreml uchun qurol tashib keltirgan kemasozlik kompaniyasiga qarashli Lady R kemasi dekabr oyida transponderini o‘chirib qo‘yib, Janubiy Afrikadagi eng yirik harbiy-dengiz bazasiga kelib to‘xtagan, u yerga noma’lum yuklarni yetkazgan va tushirgan. Bu haqda The Wall Street Journal xabar bermoqda.

Janubiy Afrika kema nimani tashib keltirgani yoki unga Saymonstaun harbiy-dengiz bazasida qanday yuk ortilganini ma’lum qilishdan bosh tortgan.

Rossiya kemasozlik kompaniyasiga qarashli Lady R kemasining tashrifi Vashington va Pretoriya o‘rtasidagi aloqalarni keskinlashtirgan. Bu AQSH va ittifoqdoshlarining Moskvaga qarshi sanksiyalarga rioya etilishini ta’minlash yo‘lidagi qiyinchiliklarini ham ko‘rsatadi, deb yozadi nashr.

AQSHning yuqori lavozimli vakili aytishicha, Vashington Janubiy Afrika qurolli kuchlari tomonidan Lady R kemasiga ko‘rsatilgan ko‘makdan, xususan, uning harbiy-dengiz bazasiga kirib, yuklarni joylashtirishga ruxsat berilganidan xavotirda.

Ikki kecha davomida ko‘chma kran qurolli qo‘riqchilar nazorati ostida 122 metrli kemadan qutilarni tushirgan.

Janubiy Afrikaning muxolifatchi Demokratik alyansi vakili, deputat Kobus Mare Lady R Rossiyadan qurol-yarog‘ olib kelganini ma’lum qildi, ammo ular odatda tijorat portlari orqali import qilinadi.

AQSH 2022-yil 8-may kuni Lady R’ga qarshi sanksiyalar kiritgandi.