Ronaldu Saudiya Arabistoni klubiga o‘tib, mamlakatning JCH—2030 mezbonligi bo‘yicha elchisiga aylanishi mumkin

Krishtianu Ronaldu “An-Nassr”ga o‘tishga yaqin.

Marca nashrining xabariga ko‘ra, Saudiya jamoasi yaqin orada portugaliyalik futbolchiga rasmiy taklif bermoqchi. Ronaldu klub bilan 2030-yilgacha mo‘ljallangan shartnoma imzolaydi. 2,5 yil davomida “An-Nassr” sharafini himoya qiladi va qolgan yillarda Saudiya Arabistoni, Gretsiya va Misrning JCH—2030 mezbonligi uchun qo‘shma arizasi bo‘yicha elchi vazifasini o‘taydi.

Qayd etish kerak, 2030-yilgi mundial mezbonligi uchun Ronalduning vatani Portugaliya Ispaniya va Ukraina bilan qo‘shma ariza topshirgan.

Shuningdek, Krishtianu “An-Nassr”ga o‘tsa, klub moliyaviy qoidalarni buzmaslik uchun uch nafar futbolchisi bilan xayrlashadi. Jamoani tark etishi mumkin bo‘lgan o‘yinchilar ichida Gonsalo Martines va o‘zbekistonlik Jaloliddin Masharipov ham bor.

Ronaldu 2,5 yillik faoliyati davomida 200 million yevro ishlab topadi. JCH—2030 elchisiga aylangach, uning daromadi yanada oshadi.