O‘zbekistonda tabiiy gaz ishlab chiqarish hajmi kamaydi, ko‘mir esa ko‘paydi

Davlat statistika qo‘mitasi O‘zbekistonning 2022-yil yanvar—noyabr oylariga ko‘ra sanoat ishlab chiqarishi haqida ma’lumot berdi.

Ma’lumotlarga ko‘ra, yanvar—noyabr oylarida 47,3 mlrd kub metrdan oshiq tabiiy gaz, 1,2 mln tonna gaz kondensati ham ishlab chiqarilgan.

Shuningdek, noyabr oyining o‘zida mamlakatda 3,5 mlrd kub metrdan ortiq tabiiy gaz, 108,1 mln tonna gaz kondensati ishlab chiqarilgan.

O‘tgan yilning shu davriga nisbatan ikkala sanoat sohasida ishlab chiqarish kamaygan — mos ravishda 1,6 mlrd kub metr (3,2 foiz) va 23,8 ming tonnaga (2 foiz).

Shuningdek, yil boshidan beri O‘zbekistonda 4,8 mln tonna ko‘mir ishlab chiqarilgan. Bu o‘tgan yilning xuddi shu davriga nisbatan 174,1 ming tonna ko‘p. Birgina noyabr oyining o‘zida bu ko‘rsatkich 432,6 ming tonnani tashkil etgan.

Mamlakatda joriy yilning sentyabr oyida 476,7 ming tonna, oktabr oyida esa 484,4 ming tonna ko‘mir ishlab chiqarilgan edi.

Oktabr oyida 65 ming tonna, 2022-yilning dastlabki 11 oyida 721,2 ming tonna neft ishlab chiqarilgan. O‘tgan yilning shu davriga nisbatan sohadagi ishlab chiqarish 12,9 ming tonnaga ko‘paygan.

Mavzuga doir: 2022-yilda dunyoda ko‘mir qazib olish rekord darajaga yetishi kutilmoqda