Joriy yilning noyabr oyida O‘zbekistondagi banklararo to‘lov operatsiyalari va Tovar-xomashyo birjasidagi faollik tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
2022-yil noyabr oyida banklararo to‘lov operatsiyalari soni 6,12 milliontani tashkil etdi va 2022-yilning oktabr oyiga nisbatan 411,4 ming tranzaksiyaga (7,2 foiz) oshdi. Banklararo to‘lov operatsiyalari soni 11 ta hududda oshgan.
Noyabrda mamlakatning 11 ta hududida yuridik shaxslar o‘rtasidagi bank operatsiyalari soni o‘tgan oyga nisbatan oshgan.
Sezilarli darajadagi o‘sish Andijon (27,7 foiz), Samarqand (10,8 foiz), Farg‘ona (6,7 foiz) viloyatlari va Toshkent shahrida (8 foiz) kuzatilgan.
Shu bilan birga Jizzax (-5,7 foiz), Sirdaryo (-4 foiz) va Qashqadaryo (-1,7 foiz) viloyatlarida kamayish kuzatilgan.
Tovar-xomashyo birjasidagi faollik
2022-yilning noyabr oyida Ishbilarmonlik faolligi indeksining birja komponenti 1,0584 birlikni tashkil etdi.
Bu esa ushbu komponentning o‘tgan oyga nisbatan 5,8 foizga oshganligini anglatib, har bir bitim bo‘yicha sotib olingan tovarlar o‘rtacha hajmining 11,5 foizga va bitimlar sonining 0,1 foizga oshganligi bilan izohlanadi.
Tovar-xomashyo birjasida tovarlar savdosi umumiy aylanmasi hajmi 2022-yil noyabr oyida 6,35 trln so‘mni tashkil etib, ushbu ko‘rsatkich o‘tgan oyga nisbatan 1,3 foizga kamaygan.
Avvalroq O‘zbekistonning qaysi hududlarida ishbilarmonlik faolligi o‘sgani ma’lum qilingani haqida xabar berilgandi.
Izoh (0)