O‘zbekistonda inflyatsiya 13-16 foiz bo‘lishini kutayotgan tadbirkorlar ko‘paymoqda

Joriy yilning noyabr oyida kelgusi 12 oy uchun narxlar o‘sishi bo‘yicha biznes vakillarining inflyatsion kutilmalari o‘tgan oyga nisbatan biroz oshib, 14,3 foizni tashkil etdi (pdf).

Inflyatsion kutilmalar — turli guruhlar bo‘yicha mos javobni belgilagan aholi sonining o‘sha javoblar o‘rtacha qiymatiga ko‘paytmalari yig‘indisini jami aholi soniga nisbati (o‘rtacha ko‘rsatkich).

Kelgusi 12 oyda inflyatsiya ko‘rsatkichi joriy darajada yoki undan yuqoriroq bo‘lishini kutayotgan respondentlar ulushi o‘tgan oyga nisbatan o‘zgarishsiz qolgan.

Inflyatsion kutilmalarning joriy inflyatsiyaga nisbati (respondentlar ulushi, foizda):

Bir yildan so‘ng inflyatsiya 13-16 foiz doirasida bo‘lishini kutayotgan biznes vakillarining ulushi ortgani holda, 17-20 foiz bo‘lishini ta’kidlaganlar kamaygan.

Biznesmenlar tomonidan keyingi 12 oyda narxlar oshishiga yoqilg‘i mahsulotlari va transport xizmatlarining narxlari qimmatlashishi (50 foiz), valyuta kursining qadrsizlanishi (48 foiz) hamda import qilinadigan xomashyo va butlovchi qismlar qimmatlashishi (32 foiz) kabi omillar ta’sir etishi mumkinligini ta’kidlaganlar ulushi oshgan.

Avvalroq O‘zbekistonda aholining inflyatsion kutilmalari ma’lum qilingani haqida xabar berilgandi.