Bir necha davlat tomonidan qidiruvga berilgan qozog‘istonlik qochoq bankir Muxtor Ablyazov Fransiyada siyosiy qochqin maqomidan mahrum etildi. Bu haqda Nur.kz xabar berdi.
Ma’lum qilinishicha, 2020-yilda Qochqinlar huquqlari bo‘yicha Milliy sud qarori bilan Muxtor Ablyazov Fransiyadan siyosiy boshpana olgan. Biroq 2021-yilda u Fransiya Davlat kengashi tomonidan bekor qilingan va Ablyazov shaxsiy manfaatlarini ko‘zlab BTA Bankda firibgarlik sxemasini yaratgani uchun qochqin maqomini olish huquqiga ega emasligi haqida qaror chiqargan. Davlat kengashining qaroriga qarshi chiqqan oligarx sudga apellyatsiya arizasi bilan murojaat qilgan.
2022-yil 8-dekabrda Qochqinlar huquqlari bo‘yicha Milliy sud Ablyazovning shikoyatini rad etgan.
“Shunday qilib, qochoq bankir Fransiyadagi siyosiy qochqin maqomidan mahrum bo‘ldi. Qonunga ko‘ra, Muxtor Ablyazov Fransiyadan deportatsiya qilinishi yoki ekstraditsiya qilinishini, ehtimol Qozog‘istonga qaytarilishi kutilmoqda”, deyiladi xabarda.
Eslatib o‘tamiz, 2020-yil dekabrda Rossiyada Ablyazov BTA Bank ishi bo‘yicha sirtdan 15 yillik qamoq jazosiga hukm qilingandi. Rossiya sudi uch yil ichida, 2006-yildan 2009-yilgacha Ablyazov o‘z qo‘l ostidagilar bilan birgalikda bankdan 58 milliard rubl o‘g‘irlaganini aniqlagan. Qozog‘istonda esa Ablyazov 20 yillik qamoq jazosiga hukm qilingandi — 2017 yilda u davlat mablag‘larini o‘zlashtirishda aybdor deb topilgan.
Izoh (0)