Sirdaryo viloyati Mirzaobod tumanida ko‘chalarni ta’mirlashdagi talon-torojlik fosh etildi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Mirzaobod tuman bo‘limi tomonidan tergovga qadar tekshiruv o‘tkazilgan. Unda Mirzaobod tuman yo‘llardan foydalanish unitar korxonasi mas’ul shaxslari va boshqalar 2021-yilda “Mirzo Ulug‘bek” mahallasi hududidagi ko‘chalarni joriy ta’mirlashda ishlarni sifatsiz amalga oshirish orqali 307 million so‘m hamda hisobotlarga haqiqatda bajarilmagan ishlarni qo‘shib yozish yo‘li bilan 143 million so‘mni o‘zlashtirish yo‘li bilan talon-toroj qilgani aniqlangan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Izoh (0)