Surxondaryoda narxni asossiz oshirgan AYQSHga benzin yetkazib berish to‘xtatildi

Ijtimoiy tarmoqlarda Surxondaryo viloyatidagi AYQSHlarda Ai-80 benzini 8000 so‘mdan sotilayotgani haqida xabarlar tarqalgan edi. Holat yuzasidan Energetika vazirligi huzuridagi “Neftgazinspeksiya” bayonot berdi.

Qayd etilishicha, holat o‘rganilganda, Termiz shahridagi “DON” xususiy firmasiga tegishli AYQSH haqiqatan ham narxni asossiz oshirgani tasdiqlangan.

Benzin narxini sun’iy ravishda oshirganligi sababli ushbu AYQSHga avtobenzin yetkazib berish to‘xtatish yuzasidan tegishli tashkilotlarga ko‘rsatma berildi, — deyiladi inspeksiya bayonotida.

Siz istiqomat qilayotgan hududda ham benzin narxining asossiz oshirilishiga guvoh bo‘lsangiz, “Daryo”ning Telegram’dagi boti (@daryo_livebot)ga bu haqda xabar bering. Biz bu haqda jamoatchilikka oshkor etamiz va muammoga mas’ullar e’tiborini qaratamiz.