Ispaniya terma jamoasi mundialda Italiya va Angliyaning antirekordini yangiladi

Ispaniya terma jamoasi JCH—2022 nimchorak finali doirasida Marokashga qarshi kechgan o‘yinda penaltilar seriyasida mag‘lub bo‘lib, musobaqa bilan xayrlashdi.

“Qizil furiya” ketma-ket uchinchi Jahon Chempionatida chorak finalga chiqa olmadi. Ispaniya so‘nggi bor 2010-yilda ushbu bosqichga chiqqan, o‘shanda jamoa chempionga aylangandi.

JCH—2014 da pireneyliklar guruhda qolib ketgan, JCH—2018 da esa 1/8 finalda Rossiyaga penaltilar seriyasida yutqazgan.

Ispaniya mundialda beshinchi marta penaltilar seriyasida ishtirok etdi. Ularning to‘rttasida ispanlar mag‘lub bo‘lgan — bu musobaqa antirekordi hisoblanadi. Angliya va Italiya uch martadan yutqazgan.