Soliq kodeksining ikkita moddasiga o‘zgartirish kiritish nazarda tutilmoqda. Bu masala bugun, 6-dekabr kuni bo‘lib o‘tgan Oliy Majlis Qonunchilik palatasi yalpi majlisida muhokama qilindi.
Majlisda kameral soliq tekshiruvi tartibi takomillashtirilishi munosabati bilan Soliq kodeksiga o‘zgartish kiritishga oid qonun loyihasi ko‘rib chiqildi. Mazkur hujjat bilan Soliq kodeksining 138-moddasi 22-qismiga va 274-moddasining 3-qismiga o‘zgartirish kiritish nazarda tutilmoqda.
Amaldagi Soliq kodeksining 138-moddasi 22-qismida quyidagilar belgilangan:
Qo‘shilgan qiymat solig‘i summasi o‘rnini qoplashga nisbatan kameral soliq tekshiruvi soliq to‘lovchi tomonidan soliq davri uchun soliq hisoboti taqdim etish chog‘ida soliq organlari qo‘shilgan qiymat solig‘ining salbiy summasi o‘rnini qoplash (qaytarish) to‘g‘risida xabardor qilingan kundan e’tiboran oltmish kun ichida soliq organining buyrug‘isiz, O‘zbekiston Respublikasi Vazirlar Mahkamasi tomonidan belgilangan tartibda amalga oshiriladi. Qo‘shilgan qiymat solig‘i summasi o‘rnini qoplashga nisbatan kameral soliq tekshiruvi natijalariga ko‘ra soliq hisobotiga o‘zgartishlar kiritish haqidagi talabnoma yozib berilmaydi.Kodeksning 274-moddasi 3-qismida shunday deyilgan:
Agar kameral soliq tekshiruvi natijalariga ko‘ra, soliq organi soliq summasining o‘rnini to‘liq yoki qisman qoplash to‘g‘risida qaror qabul qilsa, mazkur soliq summasi soliq to‘lovchiga soliq hisobotini taqdim etishda soliq summasini qaytarish haqida soliq organlari xabardor qilingan sanadan e’tiboran oltmish kundan kechiktirmay qaytariladi.Yangi qonun loyihasida yuqoridagi moddalarda ko‘rsatilgan soliqning o‘rnini qoplash muddatini 60 kundan 30 kungacha qisqartirish belgilanmoqda.
Majlisda Davlat Soliq qo‘mitasi raisi Sherzod Kudbiyev kodeksga kiritilayotgan mazkur o‘zgartirish tizimda raqamlashtirish ishlari samarali kechayotgani bilan bog‘liqligini aytdi.
Oxirgi 2-3 yil ichida soliq ma’murchiligini shiddat bilan raqamlashtiryapmiz. Buning natijasida soliq tushumlari keskin o‘sib bormoqda. Bugungi kunda QQSning 84 foizi avtomatlashtirib bo‘lingan. Jami 90 foiz hisobotlarimiz to‘liq avtomatlashtirilgan tarzda shakllanadi. Hozirda 70 foiz arizalarni 7 kun ichida ko‘rib chiqyapmiz. Qolgan qismiga 30-35 kun vaqt ketyapti. Bu qonun qabul qilinishi orqali soliq organlari vakolati qisqaradi. Ya’ni QQSni qaytarib berishda Soliq organlari kameral soliq tekshiruvi o‘tkazadi. Mana shu tekshiruvni o‘tkazishga bizga 60 kun vakolat berilgan. Shu 60 kunni 30 kunga qisqartirish nazarda tutilmoqda, — dedi qo‘mita rahbari.Sherzod Kudbiyevning aytishicha, 2022-yilning o‘tgan 11 oyi davomida tadbirkorlarga qariyb 18 trillion so‘m QQS qaytarib berilgan. Mazkur summaning 70 foizi 7 kun ichida qaytarilgan.
Muhokamalar yakunida qonun loyihasi deputatlar tomonidan qabul qilindi.
Izoh (0)