O‘zbekistonda izg‘irin sovuq hafta oxirigacha saqlanib qoladi

“O‘zgidromet” ish haftasi uchun ob-havo prognozini e’lon qildi.

Unga ko‘ra, 5-dekabr, dushanba kuni O‘zbekiston bo‘yicha vaqti-vaqti bilan qor yog‘adi, tog‘oldi va tog‘li hududlarda ba‘zi joylarda kuchli bo‘ladi. Faqat Qoraqalpog‘iston Respublikasi, Xorazm, Buxoro, Navoiy viloyatlarida kam bulutli va quruq ob-havo kuzatiladi. Havo harorati kunduzi 3 daraja sovuq – 2 daraja iliq, shimolda 4-9 daraja sovuq bo‘ladi.

Seshanba kuni faqat respublikaning sharqiy hududlarida beqaror ob-havo saqlanib turadi. O‘zbekiston bo‘yicha yog‘ingarchilik kutilmaydi, faqat Farg‘ona vodiysi viloyatlarida, shuningdek, tog‘oldi va tog‘li hududlarda kechasi va kunning birinchi yarmida qor yog‘adi. Havo harorati kechasi 5-10 daraja sovuq, kunduzi 3 daraja sovuq –  2 daraja iliq, respublikaning shimoliy hududlarida kechasi 13-15 daraja sovuq, ba’zi joylarda 20 darajagacha sovuq, kunduzi 4-9 daraja atrofida sovuq bo‘ladi.

So‘ng ish haftasining oxirigacha O‘zbekiston bo‘yicha yog‘ingarchiliksiz ob-havo bo‘lishi kutilmoqda, faqat respublikaning janubi-sharqiy hududlarida, asosan tog‘oldi va tog‘li hududlarda 7—8-dekabr kunlari ba‘zi joylarda biroz qor yog‘adi. Havo harorati kechalari 3-8 daraja, ba’zi joylarda 10 darajagacha sovuq, kunduz kunlari 3 daraja sovuq – 2 daraja iliq bo‘ladi.

Respublikaning shimoliy hududlarida esa kechasi 8-13 daraja, ba’zi joylarda 15-20 darajagacha sovuq, kunduz kunlari 2-7 daraja sovuq bo‘ladi.

O‘zbekiston bo‘yicha ayrim joylarga tuman tushadi, yo‘llarda yaxmalak yuzaga keladi.

Shu sababli “O‘zgidromet” issiqroq kiyinishni, shuningdek, yo‘llarda ehtiyot choralarini ko‘rishni tavsiya etdi.