“Xodim o‘zini qurbon qilib, ayolning hayotini saqlab qolgan”. IIV profilaktika inspektori vafoti yuzasidan tasdiqlanmagan xabarlar tarqatmaslikni so‘radi

Toshkent shahri Olmazor tumanida xizmat vazifasini bajarayotgan profilaktika inspektori N.Bobomurotov o‘ldirib ketilgandi. Ichki ishlar vazirligi matbuot xizmati holatga aniqlik kiritdi.

Jinoyatni o‘rganish jarayonida aniqlanishicha, marhum profilaktika inspektori jabrlanuvchi ayolning chaqiruviga asosan voqea joyiga borgan. Ayol o‘zining shar’iy nikohidagi turmush o‘rtog‘i o‘ldirish bilan qo‘rqitayotganini va unga chora ko‘rishni so‘ragan.

Profilaktika inspektori xabarni rasmiylashtirish maqsadida jabrlanuvchini o‘z avtomashinasida mahalla idorasida joylashgan tayanch punktga olib kelganda, ortidan shaxsiy transportida yetib kelgan B.Z. profilaktika inspektoriga o‘zi bilan olib kelgan oshxona pichog‘i bilan hujum qilib, joniga qasd qilgan. Bu vaqtda ayol qochishga ulgurgan.

“Profilaktika inspektori o‘z hayotini qurbon qilish evaziga ayolning hayotini saqlab qolgan. Bayon etilgan holat tegishli videotasvirlarda va guvohlarning ko‘rsatmalarida aks etgan.

Tergov yakunlanmagunga qadar jamoatchilik va OAVdan turli taxmin va mish-mishlardan iborat, shaxslarning sha’ni va qadr-qimmati kamsitilishiga olib keladigan axborotni tarqatmasliklarini so‘raymiz”, — deyiladi xabarda.

Ma’lumot uchun, olib borilgan tezkor-qidiruv tadbirlari natijasida IIB profilaktika inspektori hayotiga tajovuz qilgan fuqaro qo‘lga olinib, protsessual tartibda chora ko‘rish uchun prokuratura organlariga topshirilgan.