“Bu tadbir biz uchun achchiq saboq bo‘ldi”. Shahrisabz hokimligi yupun kiyingan o‘quvchi qizlar ishtirokidagi tadbir uchun uzr so‘radi
Qashqadaryo viloyatining Shahrisabz shahrida yupun kiyingan o‘quvchi qizlar tadbirga jalb qilingani haqida xabar berilgan edi. Shahar hokimligi holat yuzasidan munosabat bildirdi.
Hokimlik matbuot xizmatining ma’lum qilishicha, 30-noyabr kuni Shahrisabz shahar Yoshlar ishlari agentligi va sektor rahbarlari ishtirokida Yoshlar daftarida turganlarga navbatdagi subsidiya asosida mehnat qurollarini va to‘lovlar uchun sertifikatlar topshirish bo‘yicha tadbir bo‘lib o‘tgan.
Tadbir kun tartibida ko‘zda tutilmagan bo‘lsa-da, 2-son Bolalar musiqa va san’at maktabi qoshida tashkil etilgan ‘Tumorcha’ raqs to‘garagi rahbari va ota-onalar tomonidan farzandlari ‘besh tashabbus’ doirasida shahar bosqichidan birinchi o‘rinni olib, viloyat bosqichida ham 29-noyabr kuni ishtirok etib kelishganini bildirgan holda tanlovda yaxshi baholangan raqslarini namoyish etishni va ularni bu yutuqlarini ham tashkilotchilar tamonidan e’tirof etish taklifi bilan chiqqan.
“Shahar sektor rahbarlari tomonidan musobaqa va tanlovlarda yaxshi o‘rinlarni olgan yoshlarni tadbirlarda e’tirof etib borish an’ana tusiga aylanib qolgan. Shu sababli tadbir tashkilotchilari taklifni ma’qullab, ularga ham imkoniyat bergan. Ular ota-onalari bilan gulxan atrofida birga issiq kiyimlarda o‘tirishgan. (Bu holat rasm va videoda ham aks etgan) Faqatgina davrada o‘ynashda va taqdirlash jarayonida rasmga olish uchun qisqa vaqtda raqs kiyimida bo‘lishgan xolos”, — deya holatga aniqlik kiritgan hokimlik.
“Bu yerda tashkilotchilarni oqlashdan yiroqmiz, faqat tadbirga raqs to‘garagi qizlarini ustozi va ota-onalar tashabbusiga ko‘ra yutuqlarini baham ko‘rish uchun kelishganini anglashimiz zarur. Ijtimoiy tarmoqlarda yosh qizlarni yupun kiyimda tadbirga majburan jalb etilganini bildirgan holda bilib bilmasdan, haqoratomuz so‘zlar bilan munosabat bildirilmoqda”, — deyiladi xabarda.
Qayd etilishicha, tadbirning asosiy maqsadi “Yoshlar daftari”ga ro‘yxatga olingan yoshlarga subsidiya va mehnat qurollarini topshirishdan iborat bo‘lgan. Tadbir 17:30 da boshlanib yoshlarning xohishiga ko‘ra gulxan atrofida ko‘ngilochar dasturga ulanib ketgan va kech soat 19:30 da tugagan.
“Mazkur holat yuzasidan shahar hokimligida yig‘ilish o‘tkazilib, yoshlar tadbirini tashkil etishda e’tiborsizlik qilgan mas’ullarga choralar ko‘rildi va kamchiliklari ko‘rsatib o‘tildi. Barchadan uzr so‘ragan holda, jamoatchilikni keskin tanqidiga olib keladigan bunday holatlarga boshqa yo‘l qo‘ymasligimizni ma’lum qilamiz va bu tadbir biz uchun achchiq saboq bo‘ldi”, — deyiladi hokimlik xabarida.
Xalq ta’limi vazirligi maktab o‘qituvchi va o‘quvchilari maktab vaqtidan tashqari, ularning salomatligi hamda xavfsizligiga xavf soladigan turli tadbirlarga jalb qilmaslik bo‘yicha doimiy ravishda ogohlantirib kelinayotganiga qaramasdan shu kabi ayanchli holatlar yuzaga kelayotganini bildirgandi.
