Buyuk Britaniya sobiq bosh vaziri Boris Jonson parlamentga navbatdagi saylovlarda Aksbridj va Janubiy Rayslip saylov okrugidan deputat lavozimiga yana o‘z nomzodini qo‘ymoqchi. Bu haqda Sky News xabar berdi.
Aksbridj va Janubiy Rayslip konservativ uyushmasi “bo‘lg‘usi saylovlarda Boris Jonsonni o‘zlarining parlamentdagi a’zosi va nomzodi sifatida to‘liq qo‘llab-quvvatlashi”ni bildirdi. Sky News qayd etishicha, agar Jonson qayta saylanishga muvaffaq bo‘lsa, kelajakda yana partiya rahbarligiga da’vogarlik qilishi mumkin.
Konservator deputatlar 5-dekabr, dushanbaga qadar partiyaga ular 2024-yilda bo‘lib o‘tishi kutilayotgan saylovda qatnashish-qatnashmasligini ma’lum qilishi kerak.
Uch yil davomida Britaniya bosh vaziri lavozimini egallab kelgan Boris Jonson 2022-yil iyul oyida, qator janjallardan so‘ng iste’foga chiqqan edi. Sentabr boshida Konservatorlar partiyasi yangi saylovlar o‘tkazdi, unda o‘sha paytda Britaniya Tashqi ishlar vazirligini boshqargan Liz Trass g‘alaba qozondi. Bosh vazir sifatida Trass nomaqbul iqtisodiy islohotlarni taklif qildi va 45 kundan keyin iste’foga chiqishga majbur bo‘ldi. Jonson yana lavozim uchun kurashishga urinib ko‘rishi kutilgandi, biroq u bosh vazirlikka nomzodini qo‘yishdan bosh tortdi.
Konservatorlar partiyasi rahbari uchun navbatdagi saylov 24-oktabrga belgilangan edi, ammo u o‘tkazilmadi, chunki sobiq moliya vaziri Rishi Sunak bosh vazirlikka yagona nomzod bo‘lib qoldi. Ovoz berishdan biroz oldin, asosiy raqib, Jamoatlar palatasi rahbari Penni Mordont Sunakni qo‘llab-quvvatlab, o‘z nomzodini qaytarib oldi.