Afg‘oniston Milliy qarshilik fronti yetakchisi Ahmad Mas‘ud Dushanbedagi Hirot xavfsizlik muloqoti anjumaniga tashrif buyurdi. Bu haqda Sputnik xabar berdi.
Nashr tomonidan e’lon qilingan tasvirda Mas’udning Hyatt Regency mehmonxonasi yo‘lagi bo‘ylab qo‘riqchilar hamrohligida majlislar zaliga kirayotganini ko‘rish mumkin. Dushanbedagi konferensiyada 20 ta davlatdan 120 ga yaqin odam ishtirok etmoqda. “Tolibon” harakati rasmiylari ham tadbirga taklif qilingan. Tadbir qo‘shni Afg‘onistondan kelayotgan muammo va tahdidlarga bag‘ishlangan.
Ahmad Mas’ud o‘zining chiqishida Tojikiston prezidenti Emomali Rahmonga qo‘llab-quvvatlayotgani, Afg‘onistondagi vaziyatni to‘g‘ri baholagani uchun minnatdorlik bildirgan.
“Boshidanoq vaziyatni tushunib, to‘g‘ri anglab Afg‘onistonda tinchlik, barqarorlikni tiklashga qo‘shayotgan hissasi uchun Tojikiston hukumati va prezidentga minnatdorlik bildiraman”, — deydi u.
Bundan tashqari, Mas’ud haligacha “Tolibon”ga qarshi kurashayotgan vatandoshlarini qo‘llab-quvvatlashini bildirgan.
“Umid qilamanki, ular yana erkinlik va adolat ta’mini totib ko’radi”, — deydi Mas’ud.
Milliy qarshilik fronti 2021-yilning sentabridan buyon toliblarga qurolli qarshilik ko‘rsatib kelmoqda. Dastlab u Panjsher viloyatidagi tojiklardan iborat lashkarlar va toliblarga mag‘lub bo‘lgan Afg‘oniston hukumati harbiy xizmatchilaridan iborat edi.
Izoh (0)