Qirg‘iziston prezidenti Sadir Japarov qirg‘iz-o‘zbek davlat chegarasining ayrim uchastkalari to‘g‘risidagi shartnomani ratifikatsiya qilish to‘g‘risidagi qonunni imzoladi. Bu haqda 24.kg xabar berdi.
Qonun Jogorku Kenesh tomonidan 2022-yil 17-noyabrda qabul qilingan. Bishkekda 3-noyabr kuni Qirg‘iziston va O‘zbekiston o‘rtasida davlat chegarasining 302,29 kilometr uzunlikdagi uchastkalarini o‘z ichiga olgan alohida uchastkalari to‘g‘risida shartnoma imzolangan.
17-noyabr kuni Jogorku Kenesh O‘zbekiston bilan Qirg‘iziston-O‘zbekiston davlat chegarasining ayrim uchastkalari to‘g‘risidagi bitimni ratifikatsiya qilgan. Yig‘ilishda prezident Sadir Japarov ham ishtirok etgan. Ratifikatsiyani 64 nafari deputat yoqlagan, 19 nafari esa qarshi ovoz bergan.
Sadir Japarov imzolagan qonun O‘zbekiston bilan Kampirobod suv omborining suv resurslarini birgalikda boshqarishni nazarda tutadi. Qonunda qayd etilganidek, suvni boshqarish qo‘shma komissiya tomonidan amalga oshiriladi.
14-noybar kuni O‘zbekiston Bosh vaziri Abdulla Aripov O‘zbekiston va Qirg‘izistonning bahsli yer masalalariga aniqlik kiritilganini aytgandi. Bosh vazir Qirg‘iziston G‘ovasoy daryosining oqimiga to‘sqinlik qilmaslik va suvini ifloslantirmaslik majburiyatini olganini qayd etgan. Bundan tashqari, Qirg‘iziston hududida joylashgan, O‘zbekistonning eksklav hududi bo‘lgan So‘x tumani aholisining chegaradan o‘tib-qaytishida yanada yengillik yaratish bo‘yicha ikki davlat hukumatlari o‘zaro kelishuvga erishilgani ma’lum qilingan.
Shuningdek, bosh vazir yangi chegara chiziqlarini belgilashda O‘zbekiston chegara chizig‘idan 130 ta xonadonni ko‘chirish nazarda tutayotganini aytgan. 18-noybar kuni Senat Qirg‘iziston bilan chegarani delimitatsiya qilish va Kampirobod suv ombori to‘g‘risidagi shartnomalarni ma’qullagan.
Izoh (0)