O‘zbekiston Qishloq xo‘jaligi vazirligi va Germaniya xalqaro hamkorlik jamiyati (GIZ) “Qishloq xo‘jaligi kooperativlari to‘g‘risida”gi qonun loyihasini ishlab chiqmoqda. Bu haqda vazirlik matubot xizmati xabar bermoqda.
Ta’kidlanishicha, “Kooperatsiya to‘g‘risida”gi qonunning avvalgi tahriri 1991-yilda qabul qilingan bo‘lib, u zamonaviy ishlab chiqarishga mos kelmaydi. Unda asosan umumiy kooperativlarga oid maqolalar mavjud bo‘lib, qishloq xo‘jaligiga oid alohida maqolalar kiritilmagan.
Qonun loyihasi Germaniya qishloq xo‘jaligi federal boshqarmasining uch nafar eksperti bilan birgalikda ishlab chiqilgan.
Qayd etilishicha, ekspertlar kooperativlarda ko‘p yillik tajribaga ega. Bu jarayonga mahalliy mutaxassislar ham jalb etilgan.
Ishchi guruh kooperativlar, tomorqa yer egalari, fermerlar bilan hamkorlik qilgan. Hujjat ustida ishlash jarayonida 700 dan ortiq fermerlar bilan suhbatlar o‘tkazilgan.
2021-yilda vazirlik ishchi guruhi dastlabki qonun loyihasini ishlab chiqqan edi. U 9 bob va 48 moddadan iborat edi.
Mutaxassislarning fikricha, yangi loyihada ishlab chiqaruvchilarning manfaatlarini yanada aniqroq birlashtirish zarur.
Shundan kelib chiqib, 11 bob va 60 moddadan iborat “Qishloq xo‘jaligi kooperativlari to‘g‘risida”gi yangi qonun loyihasi qayta ko‘rib chiqilgan.
Yangi qonun loyihasida kooperativning tashkiliy tuzilmasidan tortib, uning moliyaviy ahvoli, auditi, davlat va kooperativ o‘rtasidagi munosabatlar, boshqaruv tuzilmalari va boshqa masalalargacha bayon etilgan.
Qonun loyihasiga ko‘ra, kooperativlarning faoliyati quyidagi tamoyillarga asoslanadi:
- ixtiyoriy va ochiq a’zolik;
- a’zolar tomonidan demokratik nazorat;
- a’zolarning iqtisodiy ishtiroki;
- avtonomlik va mustaqillik;
- ta’lim, o‘qitish va ma’lumot;
- kooperativlar o‘rtasidagi hamkorlik;
- jamiyatga g‘amxo‘rlik qilish.
Qonun loyihasi 2023-yil 1-fevralgacha muhokama qilinadi va tasdiqlash uchun Vazirlar Mahkamasiga kiritiladi.
Izoh (0)