O‘zbekistonda dam olish kuni yong‘ingarchiliksiz o‘tadi

Bugun respublika hududiga janubiy siklon kirib kelishi kutilmoqda, deb xabar berdi “O‘zgidromet”.

Qayd etilishicha, buning hisobiga respublikaning shimoli-g‘arbiy, janubiy va markaziy hududlarda yomg‘ir yog‘adi. Tog‘oldi va tog‘li hududlarda yomg‘ir va qor ko‘rinishidagi yog‘ingarchilik bo‘ladi.

Ba’zi joylarda shamol tezligi 15-20 metr/sekundgacha kuchayishi mumkin. Farg‘ona vodiysi viloyatlarida yog‘ingarchilik kutilmaydi. Kunduzi havo 14-17 darajagacha isiydi, bu kunning me’yoriy qiymatlariga yaqindir.

19-noyabr, shanba kuni respublikaning katta qismida yomg‘irli ob-havo saqlanib turadi, Qoraqalpog‘iston Respublikasi, Xorazm, Buxoro, Navoiy viloyatlarida yog‘ingarchilik kutilmaydi. Kechasi va ertalab respublika bo‘yicha ba’zi joylarga tuman tushishi sababli ko‘rinuvchanlik yomonlashishi mumkin. Ayrim hududlarda shamol 15-20 metr/sekundgacha esishi davom etadi. Havo harorati kechasi 5-10 daraja iliq, kunduzi 10-15 daraja iliq bo‘ladi.

Yakshanba kuni respublika bo‘yicha yog‘ingarchilik kutilmaydi, kechasi va ertalab ba’zi joylarga tuman tushadi. Harorat kechasi 3-8 daraja iliq, kunduzi 10-15 daraja iliq bo‘ladi.

Respublikaning tog‘li hududlarida qor ko‘chishi xavfi bor.

Mavzuga doir: O‘zbekistonning 6 ta viloyatida qor ko‘chish xavfi e’lon qilindi (ro‘yxat)