Toshkentdagi yer uchastkasi 46 mlrd so‘mga auksionga qo‘yildi

Toshkent shahar, Mirzo Ulug‘bek tumani, Ziyolilar ko‘chasidagi (Markaziy harbiy gospital yaqinida) yer uchastkasi kimoshdi savdosiga qo‘yildi. Lot ma’lumotlari “E-auksion” portalida e’lon qilingan.

Lot auksionga Davlat aktivlarini boshqarish agentligining Toshkent shahar hududiy boshqarmasi tomonidan joylashtirilgan. Hudud avval Mudofaa vazirligiga tegishli bo‘lgan.

Yer uchastkasining umumiy maydoni — 1 gektar. Bino va inshootlar maydoni — 14 kvadrat metr. Unda suv va gaz ta’minoti mavjud bo‘lsa ham, elektr energiyasi va kanalizatsiya tizimi yo‘lga qo‘yilmagan.

Auksionga qo‘yilgan yerning boshlang‘ich bahosi — 45,7 mlrd so‘m. Arizalar 12-dekabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Avvalroq Toshkentdagi 11 xonali hovli 3 mlrd so‘mga auksionga qo‘yilgani haqida xabar berilgandi.