Respublika shoshilinch tibbiy yordam ilmiy markazi Buxoro filialida ilk bor ochiq yurakda murakkab kardioxirurgik operatsiyalar o‘tkazildi. Bu haqda Sog‘liqni saqlash vazirligi matbuot xizmati xabar berdi.
Tahlillarga ko‘ra, jahonda yuz berayotgan o‘lim holatlarining qariyb 60 foizi yurak-qon tomir tizimi kasalliklari oqibatida kelib chiqmoqda. Shu sababli O‘zbekistonda ham mazkur yo‘nalishda eng ilg‘or innovatsion texnologiyalar, tashxislash va muolaja usullarini joriy etishga katta e’tibor qaratilyapti. Bunday murakkab amaliyotlar viloyat miqyosidagi tibbiyot muassasalarida ham bajarilmoqda.
Respublika shoshilinch tibbiy yordam ilmiy markazi Buxoro filialida tajribali yurak-qon tomir jarrohi Mustafo Obeyd boshchiligidagi bir guruh yetakchi mutaxassislar ishtirokida ochiq yurakda aorta-koronar shuntlash, mitral va aortal klapanlarni almashtirish operatsiyalari amalga oshirildi. Filialda kadrlar salohiyatini oshirish, jahondagi ilg‘or davolash-diagnostika usullari,kam invaziv muolaja turlarini amaliyotga joriy qilishga alohida e’tibor berilmoqda.
Mahalliy budjet mablag‘lari hisobidan kardioxirurgiya va angiografiya xizmatini Buxoro viloyatida keng tatbiq etish uchun zamon talablariga mos “Angioxirurgiya” binosi qad ko‘tarmoqda. Qolaversa, filial mutaxassislari Respublika shoshilinch tibbiy yordam ilmiy markazi va akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi, Rossiyaning A.N.Bakulev nomidagi yurak-qon tomir jarrohligi markazi, Hindistonning “Jaypee” klinikasi, Turkiyaning Bashkent universiteti gospitalia, Ozarbayjonning “Almaz akademy” o‘quv markazida malaka oshirib kelmoqda.
Mavzuga doir:
Izoh (0)