Qashqadaryoda “Ayollar daftari”dagi 50 nafar xotin-qizga subsidiya asosida tikuv mashina, suv nasos va elektr pech tarqatildi

Qashqadaryo viloyatining Dehqonobod tumanida ellik nafar xotin-qizga subsidiya asosida tikuv mashina, suv nasos va elektr pech tarqatildi. Bu haqda “Daryo”ga tuman hokimligi axborot xizmati xabar berdi.

Ma’lum qilinishicha, tuman hokimi Zoir Aliqulov markazdan salkam 100 kilometr uzoqlikdagi Boshchorbog‘ qishlog‘iga borib, fuqarolar uchun navbatdan tashqari sayyor qabulini o‘tkazgan.

Qabulda hududdagi tabiiy gaz, elektr ta’minotidagi kamchiliklar va suvsizlik muammosidan tashqari, ishsizlik, ayniqsa xotin-qizlarni ish bilan band qilishga urg‘u berildi. Tuman hokimining sayyor qabulida hokim yordamchisi va mahalla xotin-qizlar faolining tavsiyasiga ko‘ra, 50 nafar “Ayollar daftari”ga kiritilgan ishsiz, ehtiyojmand xotin-qizlarga o‘zlarini band qilishi uchun subsidiya tariqasida tikuv mashinalari, suv nasosi va elektr pech tarqatildi, — deydi hokimlik axborot xizmati mas’uli Murodjon Amirov.

Mahallada hokim yordamchisi sifatida ishlab kelayotgan Bobomurod Abdiyevning ma’lumot berishicha, xotin-qizlar bandligini ta’minlash uchun qishloqda kichik tikuv korxonalari ham tashkil etilgan.

Endigina ishini boshlagan xotin-qizlarga bepul, subsidiya asosida tikuv mashinalari topshirilishi ayni muddao bo‘ldi. Boisi, xotin-qizlar aynan menga va xotin-qizlar faoliga shu masalada murojaat qilib, ko‘mak so‘ragandi. Taklif va prezidentimiz yaratib berayotgan imkoniyat bilan ularning bu murojaati ijobiy hal etildi. Endilikda qishloqda yuzlab ayollar tikuvchilik bilan shug‘ullanib, o‘zini o‘zi band qiladi, — deydi hokim yordamchisi Bobomurod Abdiyev.