O‘zini o‘zi band qilgan shaxslar: ushbu ro‘yxatga qanday faoliyat turlari kiradi?
Markaziy bankning FinLit loyihasi o‘z-o‘zini band qilgan shaxslar, bunday ro‘yxatda qanday faoliyat turlari mavjudligi haqida ma’lumot berdi.
Taksi haydovchisi va repetitor, dasturchi va kosmetolog, internet-marketolog va tarjimon, videograf va riyeltor — ularda qanday umumiylik bor?
Ularning barchasi o‘zini o‘zi band qilgan bo‘lib, ular davlat soliq xizmati organlarida ro‘yxatdan o‘tib, ish stajini hisoblash va o‘z faoliyatini qonuniylashtirish huquqiga ega bo‘lgan shaxslardir.
Hozirgi kunda o‘zini o‘zi band qilgan shaxslar shug‘ullanishi mumkin bo‘lgan faoliyat turlari ro‘yxatiga 78 ta ish va xizmatlar kiritilgan.
O‘zini o‘zi band qilgan shaxslar ixtiyoriy ravishda 1 BHM miqdorida yillik ijtimoiy soliqni to‘lab, ish staji hisobini yuritish imkoniyatiga ega.
Joriy yilning 1-noyabr sanasidan o‘zini o‘zi band qilgan shaxslar shug‘ullanishi mumkin bo‘lgan faoliyat turlari 10 taga oshib, ular 78 taga yetgan edi.
Ular quyidagilar:
- Uy hayvonlari (qoramol, qo‘y, echki, ot va boshqalar) bozorlarida vositachilik xizmati;
- Avtomobil bozorlarida vositachilik xizmati;
- Rieltorlik xizmatini ko‘rsatish (ijaraga uy topib berish, uy sotib olish va sotishga ko‘maklashish);
- Uyda sut va sut mahsulotlarini qayta ishlash va sotish xizmati;
- Maishiy buyumlarni ijaraga berish xizmati (stol-stul, idish-tovoq, asbob-uskuna va boshqalar);
- Gips va ganchdan buyumlar yasash (uy jihozlari, ertak qahramonlari haykallarini yasash);
- Tosh va tosh mahsulotlaridan yodgorlik, suvenir va dekorativ buyumlar tayyorlash;
- Yog‘och mahsulotlaridan savat, non mahsulotlari uchun maxsus idish va boshqa buyumlarni to‘qish;
- Uy sharoitida pilla yetishtirish, shaxsiy tomorqa yer uchastkasida tut mevasi, niholi va ko‘chatini yetishtirish, uyda ipak mato, ipak gilam to‘qish va sotish;
- Kulolchilik.
Avvalroq O‘zbekiston qonunchiligida 1-noyabrdan nimalar o‘zgarishi haqida xabar berilgandi.
