AQSH Yevropa Ittifoqiga va’da berdi: suyultirilgan gaz eksporti 50 mlrd kub metrga oshiriladi

3-noyabr kuni Vashingtonda Yevropa Ittifoqi va AQSHning energiya masalalari bo‘yicha maxsus guruhi yig‘ilishi bo‘lib o‘tdi. 

Uchrashuv davomida tomonlar AQSHdan Yevropa Ittifoqiga suyultirilgan gaz (LNG) yetkazib berishni oshirish tendensiyasini saqlab qolishga kelishib oldi. 

2023-yilga kelib yetkazib berish hajmi 2021-yilga nisbatan 50 milliard kub metrga oshishi kutilmoqda. Bu haqda 7-noyabr kuni Oq uy saytida chop etilgan press-relizda ma’lum qilindi.

Tomonlar 2023-yilda AQSH va Yevropa Ittifoqining barqaror energiya bozoriga intilishlariga mos keladigan narxlarda ta’minot va omborlarni to‘ldirishda ishchi guruhning ishtirokini muhokama qildi.

Ushbu chora-tadbirlarni ta’minlash uchun Yevropa Ittifoqining energiya platformasi arizalarni to‘plash va gazni birgalikda sotib olish uchun vosita sifatida ishlatiladi. 

Platforma aprel oyida Yevropa Ittifoqi mamlakatlari tomonidan tabiiy gaz va vodorod sotib olish uchun yaratilgan.

AQSH Yevropa Ittifoqiga Norvegiyadan keyin ikkinchi yirik gaz yetkazib beruvchi hisoblanadi. 16-oktabr kuni AQSH Davlat kotibining energiya masalalari bo‘yicha yordamchisi Jefri Pyatt mamlakat LNG eksportining 70 foizi Yevropaga to‘g‘ri kelishini aytgan.

2021-yilda Rossiyaning Yevropa Ittifoqiga gaz importi 155 milliard kub metrni tashkil etgan. Bunda LNG miqdori — 15 mlrd kub metr.

Gazpromning sentabr oyidagi ma’lumotlariga ko‘ra, yil boshidan beri Rossiya gazining Yevropa Ittifoqiga yetkazib berish hajmi 48 foizga kamaygan.