Qashqadaryoning Chiroqchi tumani tibbiyot birlashmasiga qarashli Uyshun oilaviy poliklinikasida xizmat vazifasini bajarib turgan 59 yoshli shifokor kaltaklandi. Bu haqda Qashqadaryo viloyati Sog‘liqni saqlash boshqarmasi matbuot xizmati xabar berdi.
Dastlabki ma’lumotlarga ko‘ra, poliklinikada 35 yildan buyon umumiy amaliyot shifokori (ayni paytda oilaviy shifokor) bo‘lib ishlab kelayotgan X.D. qabuliga 3-noyabrda soat 18:30 atrofida bir notanish erkak ikki nafar ayol bilan kelgan. Erkak shifokorga turmush o‘rtog‘ining betobligini aytib, uni tekshirib qo‘yishini so‘ragan.
Shifokor unga bemorni tekshirguniga qadar oyoq kiyimidagi loyni tashqarida yuvib kelishini aytgan. Shundan so‘ng erkak shifokorni haqoratlab, bo‘ynidan bo‘g‘ib, ayovsiz mushtlab, tepkilab tashlagan.
Olgan jarohatlari natijasida shifokor hushini yo‘qotgan va Chiroqchi tumani tibbiyot birlashmasi shoshilinch tibbiy yordam bo‘limiga peshona, ikkala yonoq, yuz, burun usti, bo‘yin sohasi yumshoq to‘qimalari lat yeyishi, ko‘kargan jarohatlari, tirnalmalar, bosh chayqalishiga gumon tashxisi bilan yotqizilgan. Ayni paytda davo muolajalari davom ettirilmoqda.
Mazkur holat viloyat sog‘liqni saqlash boshqarmasi nazoratiga olingan, huquqni muhofaza qiluvchi idoralar tomonidan o‘rganilmoqda.
Bundan avval Qashqadaryo viloyatining G‘uzor tumanida xizmat burchini bajarayotgan 57 yoshli shifokor kaltaklagandi. Uni kaltaklaganlar qamoqqa olingan.
Mavzuga doir: Surxondaryoda shifokorni kaltaklaganlarga nisbatan jinoyat ishi qo‘zg‘atildi
Izoh (0)