“Rangi sarg‘ayib, qorinchasi shishib ketyapti. Jigar sirrozi boshlanyapti”. Bir yoshli Mardonbek saxovatli insonlar ko‘magiga muhtoj

“Daryo” tahririyatiga Samarqand viloyati Kattaqo‘rg‘on tumanida yashovchi Yulduz Baratova murojaat qilib, jigarning xolestatik sirrozidan aziyat chekayotgan murg‘ak go‘dagi uchun moddiy yordam so‘radi.

Tug‘iliboq dard bilan kurashayotgan bir yoshli Mardonbekning yig‘i to‘la ko‘zlari va darddan sarg‘aygan tanasi vujudida og‘riq naqadar kuchliligini bildirib turadi. Onasining so‘zlariga ko‘ra, u hozirgacha ikki marotaba jarrohlik stoliga yotgan, biroq foydasi bo‘lmagan.

“Tug‘ilganidan keyin uch kunlik paytidan sarg‘ayishni boshladi. Tumanimizdagi poliklinikada davolandik. Qirq kunlardan keyin Samarqandga bordik. Shifokorlar Toshkentga yo‘llanma berdi. U yerda ham o‘n kun davolandik. Birinchi operatsiyasi lazer bilan qilindi. Shundan keyin bir hafta reanimatsiyada yotdi. Na suv ichdi, na ovqat yedi. O‘t qopisiz tug‘ilgan deyishdi. Ikkinchi marta yana operatsiya qilib, o‘t yo‘llarini ichakka ulashdi. Bu ham foyda bermadi. Bolamni hali ham rangi sarg‘ayib, qorinchasi shishib ketgan.

Shifokorlarning aytishicha, operatsiya vaqtinchalikka ekan, xolos. Bunaqa kasallar bir yil ham yashamaydi. Uzog‘i bilan 6-7 oy yashaydi. Operatsiya qilganimiz uchun shuncha payt yuribdi. O‘t qopi yo‘qligidan jigariga bosim tushib, jigar sirrozi boshlanyapti. Jigar ishdan chiqyapti dedi. Faqat Hindistonda davosi bor ekan. Qancha tez olib ketsangiz, shuncha yaxshi dedi. Donor topib yo otasi yo onasidan jigar ko‘chirib o‘tkazish mumkin ekan. Davolashga 30-35ming dollar kerak.  5ming dollarga yaqin pul yig‘ildi.

Hozir ham rangi sarg‘aygan. Tez-tez isitma qilib qoladi. Dorilarini o‘z vaqtida berishga harakat qilyapmiz. Har davolanganimizdan so‘ng, bir hafta, bir oylar yaxshi yuradi. Dorilarning kuchi ketganidan keyin yana holsizlanib qoladi. Isitma qiladi.

Har bitta ukolini kamida 300mingdan olamiz. 150 mingga olinadigan suti 2-3 kunga yetadi. Bu birinchi farzandim. Ikkinchisi endi ikki oylik bo‘ldi. Oilada faqat xo‘jayinim ishlaydi. Ularni topgani davolatishga ketyapti. Yaxshi insonlardan bolam uchun yordam berishlarini so‘rayman”.

Mardonbek Temurovga xayriya qilish uchun ma’lumotlar:

Plastik karta Yulduz Baratovaning nomiga ochilgan

Humo: 9860 0824 5845 5902

Bog‘lanish uchun: (99) 2957716

“Mehridaryo” loyihasi uchun murojaatlar @mehri_daryobot orqali qabul qilinadi.