Twitter bosh direktori Parag Agraval va moliyaviy direktor Ned Sigal kompaniyaning San-Fransiskodagi bosh qarorgohini tark etdi. Bu haqda CNBC muxbiri Devid Faber xabar bergan.
“Endi Twitter’ga Ilon Mask rahbar bo‘ldi”, — deb yozdi u.
SpaceX va Tesla asoschisi Ilon Maskning o‘zi ham Twitter ijtimoiy tarmog‘ini sotib olish bo‘yicha bitim yakunlangani haqidagi ma’lumotlarni izohladi. “Qushcha ozodlikka chiqdi”, — deb yozdi biznesmen. Ijtimoiy tarmoqning logotipida qush tasvirlangan, uning nomi esa “qush sayrashi”, “chug‘ur-chug‘ur” deb tarjima qilinadi.
Avvalroq Reuters o‘z manbalariga tayanib, Mask tomonidan ijtimoiy tarmoqning 44 milliard dollarga sotib olinishi bo‘yicha oldi-sotdi bitimi rasman yakunlanganini ma’lum qilgandi. Shundan keyin biznesmen avvalgi rahbariyatni — kompaniya bosh va moliyaviy direktorlari Parag Aragval va Ned Sigalni, shuningdek, huquqshunos Vijayu Gaddeni ishdan bo‘shatgan. CNBC jurnalisti Devid Faber ma’lum qilishicha, kompaniyaga Maskning o‘zi rahbar bo‘lgan.
27-oktabr kuni Mask Twitter sahifasidagi maqomini Chief Twitter’ga o‘zgartirdi va o‘zining rakovinasi bilan Twitter ofisiga ko‘chib o‘tgani haqidagi videoni e’lon qildi.
O‘sha kuni biznesmen Twitter’ni nima sababdan sotib olganiga izoh berdi va buni odamlar kelajakda turli fikrlarni muhokama qilish uchun raqamli maydonga ega bo‘lishi uchun amalga oshirganini aytdi.
“Men buni o‘zim sevgan insoniyatga yordam berish uchun qildim”, — deb yozgan Mask. Uning qo‘shimcha qilishicha, “barcha sa’y-harakatlarimizga qaramay, maqsadga erisha olmaslik bu — real ehtimoldir”.
Izoh (0)