NASAMS havo mudofaa tizimining dastlabki ikkita zenit-raketa kompleksi Ukrainaga joylashtirilmoqda. Bu haqda Raytheon Technologies kompaniyasi bosh direktori Greg Xayes CNBC telekanaliga bergan intervyusida aytib o‘tdi.
“Biz bir necha hafta oldin AQSH hukumatiga ikkita NASAMS tizimini yetkazib berdik. Ular bugun Ukrainaga joylashtirilmoqda”, — dedi u.
Xayesning so‘zlariga ko‘ra, AQSH rasmiylari Kiyevga Patriot havo mudofaa tizimlarini emas ikkita NASAMS tizimini yetkazib berishni ma’qullagan. Uning ta’kidlashicha, Patriot bo‘yicha muzokaralar muntazam olib borilmoqda ammo yakuniy qaror Oq uyda qolgan.
Raytheon kompaniyasi NASAMS — o‘rta masofaga mo‘ljallangan havo mudofaa tizimini ishlab chiqaradi. U “havo-havo” raketasini olib yuradi. Kompleks mavjud va yaqinlashayotgan dushman samolyotlari, dronlari va qanotli raketa tahdidlarini aniqlash, urish va yo‘q qilish qobiliyatini maksimal darajada oshiradi.
NASAMS’dan 12 ta davlat, jumladan AQSH, Norvegiya, Finlyandiya, Ispaniya, Niderlandiya, Ummon, Litva, Indoneziya, Avstraliya, Qatar, Vengriya va nomi oshkor etilmagan yana bir davlat foydalanadi.
11-oktabr kuni Oq uy Milliy xavfsizlik kengashining strategik aloqalar bo‘yicha koordinatori Jon Kirbi Qo‘shma Shtatlar “yaqin kelajakda” Kiyevga birinchi ikkita NASAMS havo mudofaa tizimini yetkazish kutilayotganini aytgan edi.
Pentagon Raytheon kompaniyasi bilan NASAMS komplekslarini Ukrainaga yuborish bo‘yicha avgust oyi oxirida qiymati 182,2 million dollardan ortiq bo‘lgan shartnoma imzolagan.
Izoh (0)