“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 3-soni mehmoni adliya vazirining davlat tili masalalari bo‘yicha maslahatchisi, bloger Shahnoza Soatova bo‘ldi. Ko‘rsatuvning bu galgi mavzusi — o‘zbek tilini o‘rganish muammolari.
Ko‘rsatuv davomida Shahnoza Soatova davlat tilini rivojlantirish bo‘yicha amalga oshirilishi zarur bo‘lgan ishlarga to‘xtalib, unga doir barcha savollarga javob beradigan universal portal ochish fikrini ilgari surdi:
O‘zbek tilida hamma savollarga javob beroladigan bitta yaxshi elektron portal kerak. Saytga kirgan odam lug‘atni ham, etimologiyani, til tarixini, imloni, qisqartma so‘zlarning kengaytmalarini ham o‘sha yerdan topolsa; o‘sha yerda onlayn maslahatchi o‘tirsa, saytdan topolmagan ma’lumotingni so‘raganda, javob bersa. Bu ham kerak.Uning ta’kidlashicha, holatni yaxshilash uchun til borasida berilgan birgina topshiriqni shunchaki bajarib qo‘yishgina emas, aksincha tizimli o‘zgarishlarni amalga oshirish kerak.
Nechta farmon-u qarorlar qabul qilindi, til to‘g‘risida qancha topshiriqlar bajarildi, hisobotlar berildi, yopildi. Lekin nega o‘zgarishlar kam? Chunki topshiriqlarning tizimliligi, davomiyligi ta’minlanmagan.Til o‘rgatuvchi bitta saytni ochib qo‘yish mumkin. Lekin uning ustida tahririyat ishlash kerak, mutaxassislar jalb qilinishi kerak, ularga doimiy resurs berish kerak, mablag‘ ajratish kerak. Mana shunday davomiy loyihalarimiz yo‘q, — deydi bloger.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)