Marg‘ilonga jahon hunarmandlar shahri maqomi berildi. Bu haqda “Atlas bayrami” xalqaro an’anaviy to‘qimachilik festivalida ma’lum qilindi, deya xabar bermoqda “Daryo” muxbiri Azizjon Ermatov.
Qayd etilishicha, festivalning tantanali ochilish marosimida Marg‘ilon shahriga Butunjahon hunarmandlar kengashi tomonidan jahon hunarmandlar shahri maqomi berilganini tasdiqlovchi maxsus sertifikat topshirilgan.
“Jahon ipak va ikat hunarmandlari shahri” maqomini tasdiqlovchi sertifikatni Marg‘ilon shahar hokimi Adham Ziyavitdinov Butunjahon hunarmandlar kengashi prezidenti Saad al-Qaddumiydan qabul qilib olgan.
Ta’kidlanishicha, ushbu sertifikat Marg‘ilon shahrining World Crafts Council – Jahon hunarmandchilik kengashi tarmog‘iga kiritilishini ta’minlaydi.
Ma’lumot uchun, Jahon hunarmandlari shahri maqomi 2014 yilda tashkil etilgan bo‘lib, shu kungacha unga jahonning turli mamlakatlaridagi 57 ta shahar sazovor bo‘lgan. Marg‘ilon ushbu ro‘yxatga kiritilgan O‘zbekistonning uchinchi shahri hisoblanadi. Avvalroq yog‘och o‘ymakorligi uchun Qo‘qonga, zardo‘zlik uchun Buxoroga jahon hunarmandlar shahri maqomi berilgan edi.
Izoh (0)