Rodrigo “El-Klasiko”da so‘nggi 106 yillikdagi rekord natijani qayd etdi

“Real” hujumchisi Rodrigo La Liga 9-turi doirasida kechgan “Barselona”ga qarshi o‘yinda (3:1) o‘ziga xos natija qayd etdi.

Rodrigo uchrashuvning 90+1-daqiqasida penaltidan unumli foydalanib, o‘z hisobiga gol yozdirib qo‘ydi. Braziliyalik 1916-yildan keyin “El-Klasiko”da penaltini muvaffaqiyatli amalga oshirgan eng yosh futbolchiga aylandi.

Futbolchi 21 yosh-u 280 kunligida penaltidan gol urdi. Avvalgi rekord “qaymoqranglilar”ning afsonaviy futbolchisi va sobiq prezidenti Santyago Bernabeuga (20 yosh-u 310 kun) tegishli edi.

Shuningdek, Rodrigo klasikolarda o‘zi penalti ishlab, undan muvaffaqiyatli foydalangan to‘rtinchi futbolchiga aylandi (statistika 2003/04-yilgi mavsumdan beri hisoblab kelinadi). Undan avval Krishtianu Ronaldu (2014), Luis Suares (2018) va Serxio Ramos (2020) ushbu natijani qayd etgandi.

Rodrigo joriy mavsum barcha musobaqalarda 12 ta o‘yinda ishtirok etib, 5 ta gol va 3 ta golli uzatmaga mualliflik qildi.