Qozog‘iston Mudofaa vazirligi KXSHT (Kollektiv xavfsizlik shartnomasi tashkiloti) harbiy mashg‘ulotlari yakunlanganidan so‘ng Rossiya va Belarus qurolli kuchlari Qozog‘iston hududi bo‘ylab harakatlanishini ma’lum qildi, deb yozmoqda Tengrinews.
26-sentabrdan 8-oktabrgacha Jambil va Olmaota viloyatlarida KXSHTning “O‘zaro hamkorlik-2022”, “Qidiruv-2022”, “Eshelon-2022” Tezkor harakat kollektiv kuchlari ishtirokida mashg‘ulotlar bo‘lib o‘tdi.
Ushbu mashg‘ulotlar yakunlangach, 8-oktabrdan 15-oktabrgacha bo‘lgan muddatda harbiy eshelonlar Qozog‘iston hududi orqali doimiy joylashtirish punktlariga qaytadi. Rossiya va Belarus Qurolli Kuchlarining harbiy kontingentlari mamlakatimiz hududi orqali Qozog‘iston temiryo‘llari bilan avval kelishilgan poyezdlar jadvali bo‘yicha ikki yo‘nalishda: janubdan sharqqa va g‘arbga qarab harakatlanadi, — deyiladi vazirlik xabarida.Bundan tashqari, Qozog‘iston Qurolli kuchlari qo‘shinlari va bo‘linmalari mamlakat bo‘ylab temiryo‘l va g‘ildirakli harbiy texnikada harakatlanadi.
Qozog‘iston Mudofaa vazirligi ushbu mavzudagi soxta xabarlarga ishonmaslikka va faqat rasmiy ma’lumotlardan foydalanishga chaqirdi.
Fuqarolardan harbiy texnika harakati haqidagi soxta xabarlar va videolarga munosabat bildirmaslikni va faqat rasmiy ma’lumot manbalariga ishonishni so‘raymiz, — deya ogohlantirdi vazirlik.
Izoh (0)