Jizzaxda 18 yoshli qizning sumkasidan kuchli ta’sir qiluvchi dorilar topildi, ularni sotgan yigit qo‘lga olindi

Jizzax viloyati markaziy dehqon bozorida o‘tkazilgan reyd tadbirida 18 yoshli qizning yonidan kuchli ta’sir qiluvchi dori vositalari aniqlangan. Bu haqda viloyat IIB ma’lum qildi.

Reyd tadbirida 18 yoshli qiz ichki ishlar bo‘limiga olib kelinib, shaxsiy tintuv qilingan. Tekshiruv davomida ushbu fuqaroning sumkasidan 40 dona kuchli ta’sir qiluvchi dori vositasi borligi aniqlangan.

Tezkor tadbir davom ettirilib, ushbu dori vositalari kimdan olingani o‘rganilgan. Dorilar Sharof Rashidov tumanida istiqomat qiluvchi 27 yoshli shaxsdan olingani ma’lum bo‘lgan. Ushbu shaxs boshqaruvidagi Lacetti avtomashinasi xolislar ishtirokida ko‘zdan kechirilganda 21 dona kuchli ta’sir qiluvchi dori topilgan.

Holat bo‘yicha qo‘shimcha surishtiruv ishlari davom ettirilmoqda.