Dunyoda inflyatsiya va ijtimoiy tengsizlik kuchaymoqda — BMT bosh kotibi

Butun dunyoda inflyatsiya o‘sib, tanazzul yaqinlashmoqda. Shu bilan birga, ijtimoiy tengsizlik va qashshoqlik kuchaymoqda. Bu haqda BMT bosh kotibi Antoniu Guterrishga tayanib, “TASS” xabar bermoqda.

Biz tiklanish o‘rniga tanazzulga yaqinlashyapmiz. Jiddiy muammolarga duch kelmoqdamiz: inflyatsiyaning o‘sishi, katta qarzlar, tengsizlikning kuchayishi, qashshoqlik, to‘qnashuvlar va yonayotgan sayyora, — dedi u.

Guterrish shu munosabat bilan inqirozga qarshi kurashish va barqaror tiklanishni ta’minlash zarurligini ta’kidladi.

BMT bosh kotibi tomonidan taklif etilgan chora-tadbirlarga issiqxona gazlari chiqindilarini kamaytirish va muqobil yoqilg‘i turlarini izlash kiradi.

Shuningdek, dunyo barqaror rivojlanish maqsadlariga erishishga intilishi va bu borada rivojlanayotgan mamlakatlarga yordam berishi kerak, dedi BMT bosh kotibi.

Uning fikricha, dunyo ham rivojlangan va rivojlanayotgan mamlakatlar o‘rtasidagi daromadlar tafovutini to‘xtatishi kerak, buning uchun “kuchlar va resurslar balansi”ni o‘zgartirish zarur.

Bularning barchasida parlamentlar bizning almashtirib bo‘lmaydigan hamkorlarimizdir. Keling, ko‘proq barqarorlik va osoyishtalik hukm suradigan dunyoni barpo etish uchun qo‘limizdan kelgan barcha ishni qilaylik, — deya qo‘shimcha qildi BMT bosh kotibi.

Avvalroq Rossiya BMT bosh kotibini tashkilot nizomini buzganlikda ayblagani haqida xabar berilgandi.